البال ضااايق والصدر حيل مخنووووق

البال ضايق والصدر حيل مخنوق
ودْموع عيني فوق خدي سكيبه


ونومي غدى من بين الاجفان مسروق
حالي واعرفه زين .. هذا نصيبه


كث ّ الزمن ملحه على ذيك الحروق
اللي بقلبي .. وفاقد ٍ له طبيبه


كود الألم فيني مثل قطع العروق
هم .. وعذاب .. وضيم / حاله صعيبه


ما غير انا انسان ٍ للاحزان مخلوق
أفيق انا من جرح / تاتي مصيبه


واروح اسجل لي مع آلامي وثوق
وعهد الألم مابه نقيض ٍ يعيبه


دام الدموع اطّالب العين بحقوق
وقت الفرح نفسي أجل وش تبيبه..؟


والله ما فيني على الضحكه شفوق
في داخل اقليبي مشاعر غريبه


أنا الشعر عندي حزن خالط طروق
ودفتر قصيدي ماله الا نحيبه


يا ليت من بعد الدجى ياتي شروق
مير البلا امن الشمس طوّل مغيبه


أسهر طوال الليل والصدر مخنوق
ودموع عيني فوق خدي سكيبه