يلي على وجهي قريتي كل صفحات الشقى
اقري وأنا باكتب قصيدة واشعل الساحة حريق
باقي كثر ما راح واللي راح نصف اللي بقى
وان ماوصلت لغايتي باموت في نصف الطريق
يابنت يوم امطر غلاك بقلب ضيدان وسقى
تدرين وش سبة شقاه وسبة الجرح العميق ؟
شقاه من يمناه واسم الشيخ والنفس امحقى
والجرح منك ياأعذب العذبات يالموت الرقيق
يابنت جيتك والثمن عمري ابي ليلةٍ لقا
يما كذا والا بلاش من الصداقة والصديق
وساعة تبسمتي وشفت الجمر والثلج اصدقا
قلت أشهد أن الموت حق وصحت لك صيحة غريق
واعتقت دمعي والزعل والحزن لرضاك أعتقا
وأغفت عيوني في عيونك ياعساها ما تفيق
وامنت باللي سخرك تقرين صفحات الشقا
واشعلت بردي في دفاك وشبت الساحة حريق
..
|