.
.
فرقاك مثل الشتاء والوصل برد وسلام
ونهاية الحب قدّامي وجرحك ورى
لو إن عندي مثل قلبك وأحب الخصام
ماكان دمعي على أرض انتظارك جرى
صرت ألمح العطف فـ شفاه البشر ( ياحرام )
إلين راسي على لمسة يديهم ضرا
خليتني طفل من بعدك وبين الزحام
سرت لياليه بأفراحه وهو ماسرى
ضايع مثل مايضيع الليل بين الحمام
فقير مايملك إلا جرح ملّ وبرى
ميّت مثل مايموت الثار بين الكرام
حزين وأكتب عن غيابك ولاأحدن قرى
وحيد مامرّني من رحت غير الظلام
وأستغفر الله إذا هجرك ببالي طرى
واليوم جيتك وأنا بين العتب والملام
بأبيع جرحك وتقصيرك على اللي شرى
خذ ذكرياتك قبل ترحل وخلّ الكلام
أنا تكلمت لين الكون كله درى
فرقاك مثل الشتاء والوصل برد وسلام
ونهاية الحب قدّامي وجرحك ورى ..!
عبدالرحمن الرويس
|