،
مسآء الخير هالمـره بلاش آسف على التأخيـر
مادامـ الرد بعيونك دموع بكل تأخيره
ثقل دم العذر وإلا كسح وجه الخطى تبرير
مدامك عارفه طبعي اجل وشوله الحيره
ترا ماجيت لأجل اسمع سواليفك عن التقصير
اعرف ان الخطأ مني بلاش نعيد هالسيره
أنا وانتي بهالدنيا تحملنا بعضنا كثير
تعودتي على عنادي وصرت أحب هالغيره
انا وانتي حكايتنا مثل صدر السما والطير
كثير اللي يطالعها ولا احد(ن) طالها غيره
أنا وانتي حكايتنا مثل لعبه وطفل صغير
مع إنه دوم يهملها رفض يسمح بها لغيره
انا وانتي وش اوصف لك عجز عن وصفنا تعبير
مثل .. مدري مثل وشو .. ولكن صعب تصويره
انا وانتي .. بلاش انتي .. انا لو بفقدك شيصير
عليم الله لو مانتي فلا مريت هالديره
أحبك ! إيه احبك .. ذي بعد يبغى لها تفكير !
يخلف الله على عقل ملكتي كل تفكيره
تعالي نحترم شيبة غلانا لعنبو التصوير
تعالي نغتنم فرصة لقانا دامها قصيره
مساء اللي تبين انتي على كيفك صباح الخير
انا كل يوم بتأخر إذا في دمعتك خيره !
،
|