خلااااص ضاقت بي الرياض
لامن رمـى ليـل العنـا همّـه علـي لْحالـي
وغيري قضى هالليل نايم في حضـن محبوبـه
وآنا اسهره متوسـدٍ حزنـي وضيقـة بالـي
من وحدة ٍطالت وفرحـة خافـق ٍمسلوبـه!
والذكريات اللي مضـت لـي زوّدت غربالـي
والنفس طابت.. والصبر عوّد علـيّ عقوبـه
"ياخالـد حمـود" الحكايـه كلّـهـا ياغـالـي
ودّي أفضفض لك خوافـي نفسـي المغصوبـه
مانيب شاكي من سواليـف الهـوى واطلالـي
ولانيب شاكي لك جروحي من جفـا رعبوبـه
مشتاق لك والله وانا كـل مـا ذكرتـك خالـي
أتذكّـر أيـام (الخُبـر) والجامعـه كـل نوبـه
اشتقـت للشرقيـه وكـل مابـهـا يحـلالـي
واشتقت لسنين الدراسه.. والسكن.. وقروبـه
ماكنت أحسّـك ساكـن بجنبـي ودوم قبالـي؟
كنت انت ساكن وسط قلبي وعارف ٍمطلوبـه
ياهو كئيب الكـون وايامـي فـلا تهنـا لـي
ياخي بعد فرقاك .. عنـدي ماهـي بمحسوبـه
خلاااااص ضاقت بي الرياض بكبرها من تالـي
ماعاد لي فيهـا مكـان وحاجـة ٍمرغوبـه!!
هي عامره بوجود أهلهـا فـي أمـان الوالـي
والعاصمه من كـل شعـب المملكـه مخطوبـه
بس البـلا لا ضـاق قلبـي عارفـه مايبالـي
هو ياخذ الحاجه .. ويتركني غريـق ذنوبـه!
خالد!! تخيّل.. من كثر همي وسـوء أحوالـي
مابه مكان ولا صديق اسلى وأسيّـر صوبـه!!
من شقتي .. لين الدوام .. لشقتي .. منوالي!
لا الوضع هـذا يصلـح لخيّـك ولا لأسلوبـه
مافادني صدري الوسيـع اللـي ملتـه آمالـي
وحشة .. وخلّت دنيتي مـن عقبهـا مقلوبـه
كثـر الشكـاوي ماتفيـد المحبطيـن أمثالـي
أدري.. ولاتشره على مـن يهـذي بغيبوبـه
يارب أبي تيسيرك لأمـري.. وغيـرك مالـي
وان كان – نقلي- (للخُبر) حاجه مهي مكتوبه؟؟
طالبك أنا كنز القناعـه/ واقتنـع فـي بالـي:
ويصير لي حضن الرياض أدفى من المحبوبه!!
يـــابـــــوي
يـارب ياعالـم بكتمـان الصـدور ومايـجـول
صفّ النوايـا فـي نفـوس ٍللحيـاة مودّعـه
يا الله وانت أعلـم بغايـة نيتـي واللـي أقـول
القلب وإن دار الزمـن تبقـى الهدايـة مطمعـه
والشعر نظمه ماهو بكيفي وأنـا شاعـر ملـول
الشعر لامن حام مع سرب الفكـر جـاوب معـه
يابوي وانت الله عطاك مـن المهابـه والقبـول
حتى القصيد ان قيل في حضرة جنابك.. ترفعـه
لا لا تحاتي.. يابعد راسي عسى عمـرك يطـول
وانت اللي من خوفك علينا / زود حرصك تتبعه
من رحمتك فينا تَعَلَّمنـا عـن الرحمـه فصـول
من قلبـك الوافـي عرفنـا كـل خيـر ٍندفعـه
ياما على الدم والقرابه تصبر وشلـت الحمـول
ياما عملـت ومـادروا لجـل القرايـب تجمعـه
من كثر ماوصيتنا بوصل الرحم ظنـت عقـول:
إن الرَحَم أولى مـن الوالـد بطيـب ومنفعـه!!
يابو الفقير اللي تضايق مالقـى بعمـره حلـول
يابو اليتيم اللي انمسح بأطـراف كمـك مدمعـه
من يجهلك يا اللي جرى طيبك كما مجرى السيول
ما يجهلك غير الجحـود اللـي ظنونـه تخدعـه
يا الحاسم اللي نعرفك ماتقبل أنصـاف الحلـول
كل ما ذكرناْ إنك ورانـا.. ناخـذ الدنيـا سعـه
يامروّض صعاب الزمن مهما الصعايب بك تحول
ماهو مثل من قال: إن طاع الزمـن.. وإلا طعـه
إنت المواقف في حضورك ماهي أقـوال وفعـول
إنت الفعل يسبق كلامـك ليـن غيـرك يسمعـه
يابوي لو ماعادتك بالطيـب والفزعـه عجـول؟
ماضـاق ديوانـك وبيبـان البيـوت مشرّعـه
ماقد خذلت انسان جاك ولا رجـع منّـك جفـول
يوم إن أغلب هالبشـر حتـى الأخـو ماينفعـه
نلت المهابه من شيوخ ٍيـوم غيـرك ماينـول
إلا انهم..؟؟ وإلا بلاش.. أسكت وغيري يطلّعـه
أدري القصايد في رجا شرواك مـا والله تطـول
مـن رُبْـع ماتفعـل يمينـك يافخرنـا ومنبعـه
كم شاعر ٍقبلي تغنـى وجـاك فأبياتـه خجـول
با الله قلي: كـم قصيـده فالـدروج موزعـه؟؟
وأدري الشهاده فيـك مجروحـه ولكنـي بقـول
إن الشواهـد فـي كلامـي ياعـرب تستشفعـه
لكن وانا ابنك مانويت أكتب وأنا شاعـر ملـول
بس الشعر لا لاح لي.. مافيه شـي ٍيردعـه!!
روحـي الله لايـردك
لا وربّي لا حشى ماقـول روحـي بالسلامـه
إبعدي يابنـت عنـي.. روحـي الله لايـردّك
من متى مثلي تنـازل يبـدي لمثلـك ملامـه؟
والله إن قلبي وأعرفه مادرى عن جـد جـدّك
عادتـي والله خطـا غيـري أردّه بابتسامـه
لكن انتي ماسكتّـي ولاوقفتـي عنـد حـدّك!!
اسمعي من صدري المكبوت واستلمي كلامـه
صدري اللي كم شكيتي لـه غرابيـل ٍتهـدّك
صدقيني يوم صديتي عـن القلـب وغرامـه
ضعتي وضيّعتي فرصه غاليـه كانـت بيـدّك!
الغرور أكره طريقه وأرفض إسمـه واتهامـه
لكن انتي مو كفو اللـي يحتـرم رايـك وردّك
تذكرين شلون كنتـي غايـة العمـر ومرامـه
ومنهو بس اللي يفكّر أو يصيـر بيـوم نـدّك
والقصايد في لقانـا ترسـم الحـب وهيامـه
ومنيتك لو تسمعي بيتين من شعري.. تسـدّك
كان طبعك في حضورك يفرض بقلبي احترامه
وكان اسلوبي وطبعي وكـل تفكيـري يشـدّك
يوم كنتي عايشه ويّـاي فـي عـز وكرامـه
خلي صدك ينفعـك يـوم ٍتماديتـي بصـدّك
انتي الظاهـر تبيـن اللـي يبادلْـك اللئامـه
واحد ٍيضحك عليـك ومـن بَعَدْهـا يستبـدّك
واحـد ٍمايملـك بقلبـه رجولـه أو شهامـه
كل همه حاجـة ٍلامـن قضـى منهـا يهـدّك
اذكري عبـدالله لاعضيتـي ابهامـك ندامـه
واذكريني زين لاسالت دموعـك فـوق خـدّك
واخذي وقتك وابحثي في وسط هالكون وزحامه
والله ماعمرك تلاقي شخص باخلاصي يـودّك
والله إني في المحبـه ناجـح بميـة علامـه
وانتي أصلا فاشله ودرب الفشل دايـم مـردّك
فكّني الله من هواك وأحمـده جتنـي سلامـه
وانتهيتي من حياتي وانكشفتي وبـاح سـدّك
ثقـل دمـك مايعالجهـا طبيـب ولاحجامـه!!
ومخك مقفّل ويجهل من معاك ومنهو ضدّك!!!
اسمعي الزبده: ولاواحـد نبـي يكثـر كلامـه
وانتي روحي جربي غيري وشوفي اللي بودّك
بس قولـي لابكيتـي وانحرمتـي الإبتسامـه
قالها عبـدالله أول: فرصـه وكانـت بيـدّك !
طـــواري
منت عادي .. لا وربي منت عادي
.......... من عرفتك وانت دايم في علو !!
ياكثر ماشوف حولك من أيادي
.......... "انتبه" تخطفْـك منّا .. ياحلو
ياصاحبي قد شفت ناس "متنّحه"
....... بس انت مثلك؟ لا أبد مايوم شفت!!
لي بالمجالس معْـك غمز.. ونحنحه
........ وانت بغبائك خارج المعقول طفت!
شف هالبشر .. خلّـيتها مترنّحه
....... من ضحكهم.. وانت اتّـلفّت ماعرفت؟
ناس إلْعبت بالعمق .. وناس مجنّـحه
... كم لي أدافع عنك؟ .. والحين اعترفت!!
إيه بدوي.. شاعر.. وبرضو مْهندس
........... وين الغرابه بالأمر .. قولي لي؟؟
من صغري أطلع وارتقي.. ما أندس
.............. لو بيّدت روس المعالي حيلي ..
شخص عاااادي ..
لايشيل .. ولا يعادي..
هذا أنا !!
من قرْد حظي ..
لا أزال أحمل مبادي !!!
شي عاااااادي ..
ليه أصيح ؟ .. وليه أنادي ؟
والحزن من زود ضيقي ..
يختنق داخل فؤادي !!!
ياهنادي ..
لا يهمّك .. وآنا عمّك
ب ع ث ر ي هالضيق فيني
لملميـ/ـني .. حين ألمّـك..
إضحكي يانور عيني..
وقرّبي مشتاق أضمّك
طوّقي يدّيك حولي ..
حضنك أرحب من بلادي !!!
متعود أكتب من (طهارة نيّـة)
......... لو تقصر أنظار البشر "مو ذنبي"
حبيبتـي .. يانور كل الأماكن
............ سبحان من أبدع تقاسيم رسمك!!
إيه آتغزّل.. واكتب الشعر.. لكن
............ محشومه أوصف للمخاليق جسمك!!
لاتمدح الشعّـار وأهل الساحه
......... اسكت ولاتكثّر كلام .. ورح يـااا
شعّـار.. بس أهل العقول براحه!!
............. والناس خابر بالكرامه تحيـااااا
كم واحد ٍهايط وزاد صياحه
.......... ويطلع بالآخر نسخة ٍمن (يحيـى)!!
سمّيت ياخالد ظناك بإسمي
................ تيمنا ًفيني!! .. ولاهي لله !
تبغى التمايم مالها من قِـسمي
.............. ماظنتي تفرح بها .. لا والله !!
وإذا على اسمي خذ بياني الرسمي:
.............. " تبطون ماجبتوا مثل عبدالله "