الحــزيــة

08-22-2009, 08:31 PM

الحزيه = القصه او الروايه .. اللي تنحكى قبل النوم ..
القصيده .. بدون . ثرثره .
حزية عمتي نوره

اولى مشاركاتي نزفت لكم شيء مني لعله يروق لكم
ولعلي اكسب الرضا والقبول . . .
.
لتحميل القصيده .. بصوتي
http://www.moq3.com/files/dldTBs62601.zip.html
.
.

في ليلٍ زاعل القمرا وعيا لا يجيـه االنـور
.............جلست اسامر اخواني ومعنا عمتـي نـوره
وقالت عمتي ودي احزيكـم عـن المأسـور
.............حزيه صاغها وقتٍ شقاها معانق عصـوره
وكيف ان حالته شانت بعد ما بيّن المستـور
.............بعد ما فارق انسانه سقت من حبها جـذوره
تحبه كانت وكانت تشيد من غـلاه قصـور
.............وفيه مخلصه راحت وهـي للبعـد مجبـوره
وكيف انها بعد كانت تشوف ان الثواني دهور
.............تقول انا بعد فرقا حبيبي صـرت معـذوره
نسيت اسمي مع نفسي نسيت ان السنين شهور
.............نسيت ان العمر يمشي بعد ما وقف حضوره
ووفت عمتي القصه وفينـا منهـو المبهـور
.............وفينا من مسك راسه وعقله طارت طيـوره
ورحنا بعد هالقصه ونرجي هالمنـام يـزور
.............محاجرنا عسى يقبل علينـا بكـره بنـوره
غفا الاول غفا الثاني غفينـا كلنـا بالـدور
.............وانا غافي مثل غيري حلمت بحلم يا جـوره
حلمت اني انا امشي على رمضا وبين قبـور
.............وسط قريه بها مسجد بجنب بيوت مهجـوره
لقيت بأول القريه شجر فوقه بيـوت طيـور
.............وبيرٍ عافها ماها تحـت لشجـار محفـوره
وبيتٍ طايح جداره وكنه من زمـن مهجـور
.............على بابه لقيت اسمي ودمعة عيـن منثـوره
وانا امشي لفت شوفي عجوزٍ دمعها منثـور
.............تحت فيّ الشجر تجلس نساها الفرح وسطوره
احس انها امل منسي احس انها اراضي بور
.............ملامحها تقول انهـا بدنيـا الهـم مأسـوره
ملامحها تعبر لي توصف لي بكـل شعـور
.............مجرد نظرتي فيها اشوف الياس وقصـوره
وشايب منكسر ماخذ من الدنيا جروح وجور
.............اشوفه يرسم بهمه على الجدران له صـوره
ويكتب تحتها جمله بداها بحسـرة المقهـور
.............وقال باخر الجمله يا ليت الـروح مقبـوره
وقفى تارك قربه ولوحٍ بـه ثـلاث سطـور
.............تعبر عن آسى ايامه وتشكي همـه وجـوره
وطاحت منه قلاده لقيت بوسطهـا محفـور
.............رموز تقول ذا الشايب قليل الفرحه تـزوره
من المنظر بكت عيني وقلبي انثني مكسـور
.............وصفقت بأيدي الاخرى ونفسي حيل مقهوره
تمنيت اقلب الوقع واريّح شايـبٍ مضـرور
.............واسلي اعجيرٍ تشكي خفـوقٍ ملـت كسـوره
وفجأه قمت من نومي فجيع ومنفزع مذعـور
.............اثاري حلمي المحزن ( حزية عمتي نـوره )
دمتم .. بحب
دم الغدر

لتحميل القصيدة صوتية بصوتي
http://www.moq3.com/files/dldTBs62601.zip.html

اوسمتي · 08-22-2009, 08:51 PM

اول شي احييك اخوي /دم الغدر..
واقولك كل عام وانت بخ ــير..

اما من ناحية القصيده..ماشالله عليك بجد متمكن بكل ماتعنيه الكلمه..

اعجبني تسلسلك بالقصيده من بداية الحزيه الى نهاية الحلم..

لاكلمه تصفك سوى مبدع..

تأكد اننا بانتظار جديدك..

لاعدمناك..

اوسمتي · 08-22-2009, 11:03 PM

صــــــــــــــــح الله الســــــــانكـ

قصيده جزله ووافيه ومن شاعر متمكن

جاد بنانك ولله درك والىى الامــــــام

وادام الله عـــــــــزكـ

ووالله اسعدني وجودك بالمنتدى

بـآنتظار القادم على أحر من الجمر

لاهنت يااخوي ...