::روابط مهمة:: : استرجاع كلمة المرور| طلب كود تفعيل العضوية | تفعيل العضوية | تسجيل عضويه جديده
 |[ فعاليات المنتدى ]| |
||||||||||
|
|
|
|
|
|||||||
|
|||||||
| قصص واقعية - حكايات - قصص خيالية شهاب من انبلاجِ الأبجديات وبريق يرسِم الأحداث ويترنح علىِ مرفأ القَصَص والرِوايات |
|
الإهداءات |
 |
|
|
|
أدوات الموضوع | إبحث في الموضوع | انواع عرض الموضوع |
02-19-2008, 03:29 PM
|
#36 | |
|
:+:هيبة متطور:+:
|
الحادي العشر
* * * ابرار ردت بكل جراءه:خلك مع حبيبة القلب وليد?وكل وجه علامات تعجب:و ش تقولين انتي ؟؟ وش تقصدين ابرار:اللي تلبي طلباتها وليد:اها تقصدين لبنى؟؟ ابرار:زين عرفتها من نفسك..يعني عارف انك ملبي طلباتها كلها وليد:وانتي ليش زعلانه..بعدين لبنى اعتبرها مثل اختي وامون عليها لا اكثر ابرار:وانا احبك واغار منها.. ودخلت داخل.. وهي منقهره من نفسها كيف تجرءت وقالت كذا وليد تنح مكانه مو مستوعب اللي صار حس انه في حلم ابرار تحبني وتغار من لبنى؟؟ كلمات ترددت في ذهنه وقطع عليه افكاره صوت مشاري مشاري:احنا وافقين في الحر وانت مصنم هنا..ابو الشباب وليد التفت عليه بسرعه: من متى وانت هنا؟؟؟ مشاري: توني جاي وانت واقف مكانك؟؟ وش عندك وليد في نفسه:زين ما سمعت الكلام والا كان السعوديه اذا مو العالم كله عرف::: يالله يالله جيت وراح يركب السياره وليد واقف عند باب السياره.. مشاري: وراك واقف وش عندك؟؟ وليد: فواز بيجي. لبنى: يووووووه ما امدا نفتك منه ثقيل الدم سهى: ترى بعلم اخوي.. لبنى: يمه خفت. تصدقين.. علميه وش بيسوي يعني وركب فواز فواز: السلام عليكم. الكل وعليكم السلام وليد نزل من السياره لبنى: ياربي شكل روحتنا فيها عين مشاري: من جد من تتوقعين عيونه لبنى: ما ادري.. ابي اعر ف اخوك وين راح مو صاحي رايح جاي فواز: يكفي انك صاحيه لبنى: سبحان الله ما احب اتكلم معك ابد اسكت احسن * * * ام وليد: وش نسيت بعد وليد: ما نسيت شي ودخل الشاليه ودخل غرفه اهله .. الان عبير وبناتها في غرفه ...وام وليد والجده وغلا في غرفه...ام فواز وبناتها في غرفه..والشباب مع بعض <<<<<الشاليه كبير دخل غرفه اهله ولقى غلا نايمه وخذ جوالها وطلع حتى من دون ما يستاذن منها* * * * وركب السياره وليد: اسف طولت لبنى: زين حسيت بنفسك وتاسفت وين رحت فواز يلتفت عليها: وش عليك انتي حاشره نفسك في كل شي لبنى: ما اظن اني اكلمك الا اذا غيرت اسمك وصرت وليد هذا شي ثاني فواز: لا ما غيرت اسمي لبنى: اجل ليش تتكلم شوق: لبنى اسكتي مشاري: لبنى لا تسكتين عن حقك شوق: يا حبك للشر اسكت بس مشاري: هههههههههههه فيه احد يشوف مصارعه بس بالكلام على الهواء مباشره ويقول لا؟؟؟ وليد: اقول وين بترحون؟. لبنى: الراشد وليد: لا.. تبون الشاطئ مول لبنى: لا وليد: اجل نرجع لبنى: لا لا,,نصف العمى ولا العمى كله فواز: شفتي على كثر البنات محد يتكلم غيرك انتي لبنى: اللي يسمعك يقول وراك القلبيه كلها.. ما فيه الا انا وشوق وسهى فواز: حتى لو.. بس وين الباقي سهى: غلا نايمه وابرار معصبه وساره مالها نفس بتنوم تقول * * * في الرياض وتحديدا في بيت خوال غلا فيصل: الحمد الله على السلامه الكل : الله يسلمك فيصل: انا برتاح تبون شي الكل سلامتك فيصل راح يرتاح في غرفتهويفكر وشلون يبدا مع فارس وشلون يكلمه ويحل المساله بدون أي مشاكل لغلا....وقرر يدق عليه واللي فيها فيها فيصل:السلام وعليكم فارس:وعليكم السلام فيصل:انت فارس؟؟ فارس:وصلت خير امر اخوي؟ فيصل:الخير في وجهك.. بس حبيت اقابلك في اقرب وقت الاني ابيك في موضوع مهم فارس:بس انا مسافر مو في الرياض فيصل:عادي اجيك وين ما كنت..؟؟ فارس:هالدرجه الموضوع مهم.. بس ما عرفت منو معي فيصل:اكثر من ما تتوقع واذا شفتك قلتلك من انا فارس احترم رغبته وقاله انه في الشرقيه.. وقرر فيصل يروح هناك دام خالته بعد هناك * * * * في بيت منال... منال: يالله من يودينا منار: ماعاد في سواق مثل اول على كيفك منال: من جد.. وتصارخ تنادي تركي ((تركي تركي يالله)) وتركي وهو نازل من الدرج:خير تراني مو في المريخ فوق وش هالصارخ منال: عشان تسمع تركي: ما بعد صرت اصم الحمد الله منار: اقول انتي وياها يالله تركي: وين امي منال: تسلم عليك مرتها خالتي وراحت معها تركي وهو يناظر نفسه بالمرايه: وانتم ورا ما رحتوا معها منال: ما بعد جهزنا وقتها تركي: انا انتظركم برا وراحوا كلهم الانهم معزومين في بيت خالهم سعد * * * * في الشرقيه قامت شوق وما لقت جوالها وهي متعوده اول ما تقوم لازم تفتح جوالها وعلى طول طلعت لهم برا غلا: السلام عليكم الكل: وعليكم السلام غلا: محد شاف جوالي؟؟ ام وليد:لا غلا: يمه وين جوالك ادق على جوالي ما لقيته وتدق غلا على جوالها ويرد وليد غلا:الو وليد: هلا غلا: انت اللي ماخذ جوالي وليد: لا ولد الجير ان.. يعني من رد عليك تستهبلين غلا:ليش خذته وليد:كنت باخذ رقم خالي الانه امسح من عندي(يصرف ) غلا: طيب وليد في ذمتك تفتح المسجات وليد: وش معنى المسجات ما افتحها؟؟ غلا مو شغلك انا امنتك وانت كيفك؟؟بعدين تعال تروح عني يالخاين وما تقولي وليد: كنتي نايمه وش اسوي لك غلا:عاش مصرف القبايل ..بس ارجع بسرعه ابي جوالي وليد: ابشري عمتي غلا بس مالقتي وش نكهتك المفضله في الايسكريم غلا: كلنا توفي وليد: اوكي خلاص باااي سكرت غلا من وليد * * * في السياره لبنى: منهي اللي داقه وليد:يعني ما تسمعي اقول غلا والا تستهبيلن فواز: تعرف عرق اللقافه فيها لازم تتاكد لبنى: يا شينك اذا تكلمت وليد: خلاص غلا تدور جوالها ارتحتي؟؟ لبنى: ليش ضايع مشاري:ما تشوفينه معه يالخبله والا عمياء وليد: يالله كل واحد يقول طلبه بسرعه طبعا كل واحد قال نكهته المفضله بالايس كريم نزل وليد والباقي في السياره مع فواز طبعا وليد نسى جوال في السياره وفواز اخذ جوال غلا وفتح على طول على المسجات بدون ما احد يحس فيه الانه حس من مكالمه غلا لوليد ان المسجات فيها شي ويقراها الاولى كانت من فارس وغلاما سجلت امسه فطلع رقم بس وعلى بال ما يحفظ الرقم يبغى له وقت الانه مرتبك>>>lما عنده ذاكره قويه مثل فيصل وفواز اول ما شاف وليد طلع من المحل حط جوال مكانه ومقلوب عشان ما يبين النور واللي ورا مو منتبهين له بسبب هواشهم اللي مستحيل يخلص * * * وليد: هذا توفي لغلا وابرار وساره الجده: من على حسابه لبنى: لا تخافين مو على حساب فواز البخيل فواز: من جاب طاري البخل انتي وجهك الجده: انتي وراك حاطه دوبك من دوبه فواز: انا داري عنها!! لبنى: كلن يدلفع عنه . اووووووف فواز: موتي بقهرك مشاري: ماعاش اللي يقهرك وانا عايش فواز: وش عنده روميو لبنى: عنده قلب يحبني..فديتك انا ولد خالووووووو الجده: وش ذا الكلام..ياخزياه لبنى: جدتي امزح انا والا مصدقها احب واحد اصغر مني الجده: انا ادري عنك وليد دخل داخل الشاليه عشان يعطي غلا جوالها والايس كريم حق البنات وليد: السلام عليكم الكل : وعليكم السلام وليد:غلا هذا جوالك والله ما فتحته وهذا الايس كريم حقك وحق ابرار وساره غلا: مشكور ما قصرت ساره: يعطيك العافيه وليد يناظر ابرار: العفو ما سويت شي وطلع عنهم * * ودخلت لبنى وشوق وسهى لبنى: السلام عليكم الكل :وعليكم السلام لبنى: غلا ما تعلميني وش هالنوم.. ساره وعندها عذرها ملكتها بعد اربع ايام انتي وش عندك غلا: ملكتي بكره لبنى وهي تحط رجل على رجل: منهو سعيد الحظ سهى: فواز اخوي غلا: بسم الله علي لو مافي ولد غيره في هالدنيا ما اخذته شوق تبتسم: هذا وانتي ما شفتي شي غلا: وش تقصدين شوق: بعدين فهده: بينكم اسرار لبنى: لا فيه ابرار,,هههههههههههه.. وتلتفت على ابرار: وانتي وراك ماده البوز عشرين بوصه الكل يضحك على عشرين بوصه ابرار: ابد مافيني شي لبنى: بعدين ليش ما رحتي معنا فاتك نص عمري ابرار: مخليه عمري لك ويجي مسج لجوال ابرار ((يمكن ويمكن وجايز ما تصدقيني ولو قلت كلامي اخاف اجرح سكاتك ((اسكت واسكت)) ولو ان الصمت يزعجني ازعاج نفسي ولا ازعاجك لذاتك ابيك عندي وصوتك حيل واحشني واحب قربك ولو طالت مسافاتي)) وليد ابرار ابتسمت الان المسج كان من وليد ووليد خذ رقمها من جوال غلا لبنى: واخيرا شفنا ابتسامتك ابرار: احبك موووووووت لبنى: منهي انا؟؟؟؟؟؟ والكل يناظرها مستغرب!!!! ابرار: كلكم احبكم وقامت طلعت برا سهى: وش فيها اختي لا يكون استجنت لبنى: انتي ابخص غلا: انا بطلع امشي على الشاطئ احلى شي وقت الغروب شوق: خذيني معك * * في الرياض فيصل دق على فارس وقاله انه اليوم راح يجي بس فارس قاله انه راح يرجع اليوم الليل للرياض وراح يقابله * 8* * في العزيمه في المطبخ منال ووفا وفاء: تعالي وراي بسرعه بعد ما تخلص الشغاله غسل الفناجيل منال: حسيت اني خدامه اليوم عندكم وفاء: عادي يا قلبي يوم واحد ما راح يضرك..عشان امي تشوفك سنعه وتخطبك لخالد منال: كان شغلي ذا فيه خطبه اخليك لحالك وفاء: اقول لا يكثر هجرك وتعالي منال: اووووووف..طيب طلعت وفاء ومنال في المطبخ منال تكلم الشغاله : يالله بسرعه خلصي وتلتفت تدور شي يشغلها على بال ما تخلص الشغاله الا خالد قابلها بيدخل المطبخ كلهم وقفوا مكانهم محد تحرك وكل واحد في باله شي ما يدري عنه الثاني بعد مرور تقريبا عشر ثواني طلع خالد من المطبخ وهو ما يدري وش يسوي ومنال حست نفسها بتصيح الا شوي وخذت باقي الفناجيل وطلعت بسرعه * * عند خالد ياربي ذا البنت بتذبحني كل مالها وتصير حلوه بس وش فيها علي اموووووت واعرف ليش انا وش سويت عشان تقول كلامها هذاك اليوم ياربي ساعدني * * * على الشاطئ غلا قالت لشوق كل شي صار بينها وبين فواز شوق: الحين فهمت غلا: وش فهمتي يالعبقريه شوق: وليد خذ جوالك ولما نزل يشتري الايس كريم فواز خذ الجوال وما ادري وش جلس يحوس فيه ولما شوف وليد يطلع من المحل حط الجوال مكانه ولا كأنه سوا شي يعني مسوي برئ غلا:اصلا هو اللي قهر زياده يوم كلمت فيصل ولد خالتي قدامه كذا شوق: احسن يستاهل غلا: خليني من سالفتي ..وش اخبار عبادي ويون جوال شوق شوق: الطيب عند ذكره هذا هو يدق غلا: الا قولي جبنا سيرت الئط جانا ينط شوق: ههههههههه:: لا حرام عليك غلا: كل يوم انتم تكلمون بعض شوق: لا وراحت عنها غلا: شف الجحده جحدتني صدق من لقى احبابه نسى اصحابه ادق على منال اشوف اخبارها الدبه اشتقت لها دقت غلا على منال وقال لها من طق طق للسلام عليكم وقالت يوم خذ جوالها منال: تتوقعين شاف المسجات غلا: ما ادري عنه: تصدقين ودي ارسله(اللقافه ما يمدحونها))عشان يعرف اني دريت انه فتح الجوال منال: لا ماله داعي غلا: الا احسن خليه يعرف.. الا تعالي وش اخبار خالد ما صار شي جديد منال: جيتي على الجرح اااااااااااااه غلا: سلامتك من الاااااااااااه.. وش فيك ياقلبي منال: تخيلي شفته قبل شوي غلا: حركاااااااااات منال: أي حركات وللي يعافيك قلبي قسم بالله طاح الا شوي غلا: بعد انتي خلاص منال: احبه احبه غلا: يا شين اللي يحب ويتكبر منال: ما تكلم الا انتي عاد.. متى بتجون بس غلا: ان شاء الله بكره ملكة ساره بنت عمي قربت منال: ربي يوفقها يارب.. بس ما قلت لك.. منار اختي انخطبت غلا: مبررررررررروك عقبالك يارب منال: ربي يبارك بحياتك.. وعقبالك انتي عاد انتي قريب ان شاء الله غلا: لا انا ابي اتمتع بحياتي منال: اوكي غلا يبوني هالنشبات صارت عزيمتنا مو عزيمتهم تبي شي غلا:هههههههههه.. لا سلامتك قلبك وباركي لمنار منال: يسلمك ربي .. وان شاء الله يوصل سكرت غلا من منال وهي ما تدري وين تروح ما لها خلق تقابل فواز بالذات بعد الحركه اللي سواها الانه خايفه انه عرف رقم فارس وتصير سالفه مالها نهايه فقررت تدق على حنان علىب ال شوق ما تخلص مكالمتها مع عبدالله بس اللاسف صار جوال حنان مقفل غلا: اوووووووف وينها ذي بعد راحت.. صدق اني بايخه صديقتي وما اسئل عنها فقررت انها تجلس عندهم وهي ساكته الى ما يذن المغرب الانها ما بقى عليه غير خمس دقايق غلا: السلام عليكم الكل: وعليكم السلام عبير: وين شوق غلا: شوق.؟؟ ايه شوق تكلم صديقتها الجده: ياكثر ما تهذر ذا البنت بذا الجوال غلا: والله كيفها اذنها والا اذنكم الجده: انتم ما تحبون انفسكم ابد سكتت غلا الانها ما حبت تطول الموضوع وليد مستانس في الجلسه عكس اخته غلا اللي متوتره وليد مستانس الان ابرار ردت عليه بمسج ((حي الكلام اللي وصلني بجوالي.. رساله تجلي عن القلب عله لك في عميق الروح مسكن ومنزال ياواحد جعل ابشر فدوته اهديك باقة ورد من كل الاشكال ياواحد من جالسه ما يمله)) وابرار بعد استانست لما طلعت اللي بقلبها غلا ساكته وتحاول انها ما تناظر عشان ما تلقتي عينها في عينه صدفه مع انها لابسه نظارات شمسيه ما تبين وين نظراتها بس تحس انها لما تناظره تتذكر كل شي معاه وهي ما تبي تتذكر هالشي تبي تنسى الماضي وفواز من جهه ثانيه منقهر من غلا وسكوتها ومشاري ولبنى وسهى قالبين الجلسه ضحك وهبال كالعاده والجده وام فواز وام وليد وعبير وساره يخططون حق ملكة ساره* * * * * حنان في بيت عمها وجالسه في الصاله مع راكان وام راكان ام راكان:هاه يمه وافقو على البعثه راكان: والله ما بعد ردوا علي يارب يوافقون ادعي تكفين يالغاليه ام راكان: كم مده بعثتك راكان: اربع سنوات تقريبا ام راكان:لا لا يا وليدي.. 4 سنوات طويله تغيب عني راكان:يمه تكفين عاد لا تصيرين عقبه طريقي وان كل ماجت اجازه على طول عندكم ام راكان:ما راح اصير عقبة طريقك بس والله فرقاك صعب علي((وبدت تصيح)) راكان:يمه اللي يشوف دموعك يقول بكره طيارتي راكان حب يغير السالفه: يمه متى بيرجع ابوي من السفر حنان: عمي مسافر؟؟؟؟ ام راكان:ايه مسافر... بيرجع بعد 4 او 5 ايام راكان:الله يعين ام راكان:انا بروح اشوف وين رازن والعيال وبصلح لكم عشا خفيف راكان:يعطيك العافيه يمه وما بقى في الصاله غير راكان وحنان حنان:راكان انت من جدك تبي تسافر راكان:ايه.. ليش مستغربه حنان:اممممم..طيب رااكان وش رايك اسافر معك راكان:هههه..وين تسافرين معي ..اللي يسمعك يقول بروح سياحه مو دراسه حنان:ادرس طب..تكفى راكان ابغى اطلع من هالسجن راكان:ودي اخذك يا بنت عمي..بس تعالي من قالك انك عايشه بسجن,,حرام عليك حنان:انت شايف كيف ابوك يعاملني((وبدت تدمع عيونها)) راكان:يرحم والديك ماابي اشوف دموعك..اطلبي أي شي الا الدموع ما احب اشوفها حنان:قلت لك ان دموعي تخوني مو بكيفي.. راكان:حنان ابي جواب بصراحه انتي ناقصك شي بهالبيت تبين شي؟؟ حنان:راكان ممكن طلب؟؟ راكان:انتي تامرين ما تطلبين حنان  بابتسامه):ربي يخليك ابي اكلم بجوالكراكان?يمد لها الجوال:باي وقت جوالي تحت امرك وش دعوه حنان دقت اول شي على غلا الانها تحسها انها قريبه منها بس غلا ما ردت حنان: ما ردت شكلها ما ترد على اقارم غريبه عادي ارسلها مسج راكان:ارسلي أي شي تبينه حنان ارسلت رساله لغلا ((انا حنان ردي علي)) حنان كلمت غلا وجلست معها تقريبا ساعه ونص وقالت لها كل شي يخطر في بالها وفي بال غلا وكيف هم فقدوا صحبتهم ووناستهم وايامهم الحلوه وسكرت وكل وحده ضايق صدرها بسبب حال صديقتها حنان: اسفه راكان طولت راكان)يبتسم:لا عادي ما بيننا اسف:: الجوال وصاحب الجوال تحت امرك ما ابي اسمع كلمه اسفه منك حنان: فديتك ولد عمي,و يا جعلك ذخر لي يارب ام راكان: ما جعتوا؟؟؟ العشاء جاهز وراحوا يتعشون * * * * * في الشرقيه لبنى: خلاص بكره طيارتنا؟؟ مشاري: ليت ربي ما كتب لحظه وداع..لا فراق ولا دموع ولا ضياع لبنى: اسكت اسكت بس يرحم والديك.. لو يسمعك محمد عبده يتعزل الغناء وليد: اجل كمل يا خو ي عشان يتعزل وتكون الساحه لك كمل كمل بس سهى: ساحه والا فصل فواز: ههههههههه حتى انتي تعرفين تنكتين سهى: من عاشر قومن صار منهم لبنى: ما كنك تقصدينا مشاري: مو عاجبك الجلسه معنا روحي نومي محد غصبك سهى تكلم فواز: كله منك قلبوا علي * * * * في الرياض وتحديدا بيت منال:: منال: لا انهبل اخوي بيروح البعثه تركي: ايه وش فيها مو اول واحد ولا اخر وبعدين هم وافقوا على البعثه منال: خلاص خلاص بتسافر تدرس هناك منار: والله بفقدك لا تروح منال: انتي بتتزوجين وانا اللي بجلس فيها طلال: لا وقفي.. محد قالك تجلسين منال: اسكت لا اشوتك باكبر شي معي منار: امي وابوي عرفوا انهم وافقوا على البعثه تركي: عرفوا قبلكم بعد.. بس امي وابوي عندهم شرط كلهم::وشو تركي: اني ما سافر الا وانا متزوج منار: يمديك منال: انت متى سفرتك تركي: بعد شوال يعني بعد اربع شهور منار: يعني قريب لا زم تحضر عرسي والا سويت عرسي هناك طلال: خليه يتزوج هو اول بعدين تكلمي تركي: امي حالفه ما اطلع برا السعوديه والا زوجتي في يدي؟؟ منال: سهله نجيب لك عروس تركي: تستخفين دمك انتي من بترضى فيني منار: وش الف وحده تتمناك منال: مو صعبه العروس جاهزه وعندي تركي: منهي منال يدق جوالها وصارت وفاء تسالها عن نوع جهازها اللاب توب منال: ليش بتشترين واحد ثاني.. وش فيه حقك؟؟ وفاء: مو لي لخالد منال: خالد عنده واحد والا مو راضي فيه؟؟ وفاء: عنده واحد.. من قالك؟؟؟ وين شفتيه؟؟ شكلك تحلمين منال: والله شايفه واحد عندكم واحد بالخميه وفاء: ههههههههههههه هذا مو حقه حق ولد عمي محمد منال: حق محمد يعني مو خالد وفاء: لا. تعرفين محمد عايش عندنا الانه يدرس الجامعه الان اهله عايشين بالشرقيه وجهازه دايم بالخيمه منال: يعني خالد ما يدخل منه وفاء: اصلا خالد ما يدبر شي بالنت .. النت يمين وهو يسار منال: طيب خالد عنده ايميل وفاء: اقولك ما يدبر شي تقولين عنده ايميل .. تستهبلين انتي.. وبعدين خير فاتحه لي تحقيق عسى ماشر منال ولا شي بس كذا وفاء: هاه بتساعديني والا منال قالت لها كل شي تعرفه بالاجهزه * * * * وفي مكان اخر بالرياض بعد ما رجعوا العايله من الشرقيه في بيت العمه عبير.. عبير:شوق شوق:سمي يمه عبير:تعرفين يمه انك كبرتي والعرسان عند الباب شوق:مو الحين توني صغيره عبير:طيب ما تبي تعرفين منهو المعرس شوق:ما فرقت مين زواج ما راح اتزوج الحين عبير:ولد عمك عبد اللطيف شوق سكتت وتناظر امها عبير تبتسم:كنك غيرتي رايك شوق:يمه ما ادري وش اقولك؟؟ عبير:تراه ولد ما ينعاف شوق:يمه احس توني صغيره بدر ي على الزواج عبير:لا صغيره ولاشي مناسب عمرك..وترى ابوك فرح لما عرف انه تزوجك شوق:ما ادري عبير:فكري انتي واستخيري وخذي وقتك شوق:ملكه ساره بنت خالي كبيره؟؟ عبير: لا مو كبيره بكره بروح ولا يجي المغرب والا انتم جاهزين شوق وهي ترقى الدرج: ان شاء الله * * * في الجزء التالي وش تتوقعون يصير بين فيصل وفارس؟؟ ابرار ووليد بيتغير شي في علاقتهم شوق بتوافق على المعرس الجديد ومنهي العروس الجاهزه لتركي؟؟ راكان وحنان بيصير شي جديد؟؟ ومنال بتظل مثل ماهي مع خالد؟؟ كل هذا تعرفونه في الجزء الاخير * * |
|
|
|
02-19-2008, 03:34 PM
|
#37 | |
|
:+:هيبة متطور:+:
|
* * الجزء الاخـــــــــــــــيـــــــــــــــــــر * * بعد اسبوعين من ملكة ساره في بيت الجده الجده : مبروك يا شوق وعقبال غلا غلا: لا يمي توني صغيره بدري علي لبنى تقلد صوت جدتها: يوم كنت كبرك معي عمك وابوك والكل يضحك غلا: اقول شوق لا تنسينا مثل ساره تملكت وجحدتنا ساره: وش جحدتكم فيه؟؟ غلا: دايم في السوق لبنى: شوي الا تسكنين فيه؟؟ ابرار: قولي الا سكنتي.. ساره: اقول اسكتي انتي وياها يالبايخين بكره تتملكون وتعرفون ام وليد: متى ملكتك ياشوق شوق: مابعد حددت ام فواز: الله يوفقك الكل: اميييييييييين غلا: واخيرا بزف تؤم روحي ما بغى يجي هاليوم شوق: عقبالك يالدبه غلا: وش فيكم علي كلكم عقبالك عقبالك سهى: ما تبين هذا اليوم غلا: الا بس مو الحين لبنى: هذا جزاهم يدعون مالت عليك اقول غلا: مالت علي اغصان الجنه ابرار: عاد اتمنى احد يقولي عقبالك ويضحكوووووون عليها الجده: صدق ان وجيهكم مغسوله بمرق ما تستحون غلا :شوق تعالي ابغاك برا وطلعوا الخيمه شوق:امري وش بغيتي غلا:ما يامر عليك عدو شي سخيف بس بسالك وش شعورك يوم خطبك حبيب القلب شوق:تدرين عاد انه ما قالي انه بيخطبني غلا:يمكن مسويها مفاجئه شوق:مو يمكن الا اكيد.. وانا بعد موضوع الخطبه ما افتح المسن ابد ولا ارد على مكالماته ابد ابد غلا:مسويه ثقل!!!! شوق:يعني تقدرين تقولين.. الا تعالي وش سويتي مع فارس؟؟ غلا:وش اخباري؟؟؟ قديمه انتي غبااااااااااار شوق:ليش وش صار ما قلتي لي غلا:فيصل ولد خالتي كلمه وقاله انه ولد خالتي واني باخطبها وهي علمتني واحسن لك اتركها قبل ما تطيح من عين صديق عمرك وليد.. ومن هالكلام وعقبها ما شفت منه نص مسج شوق:احسن راحه...وفواز؟؟ غلا:وش فيه بعد؟؟ شوق:ماصار شي جديد بعد الشرقيه؟؟ غلا:لا مافيه واصلا انا ما شفته بعد الشرقيه ابد شوق:اقول غلا من وين شريتي خاتمك هذا؟ غلا:هذا؟؟((وتاشر على اصبع السبابه)) شوق:ايه غلا:هذا هديه التخرج من ولد خالتي فيصل شوق:حركات وصرنا نعر ف نهدي؟؟ غلا:ترى فيصل زكرت خطير شوق:اسالك سؤال وتجاوبين بصراحه؟؟ غلا:اسئلي... شوق:انتي تحبين فيصل؟؟؟ غلا:انا حبيت فواز وفيصل وفهد وفارس شوق:مو ملاحظه شي غلا:شنو شوق:كلهم بحرف الفاء غلا:خخخخخخخ. تصدقين توني استوعب سبحان الله((فواز فيصل فارس فهد)) شوق:حركات انتي مشخصه غلا:شفتي وشلون كلهم طقم مالت ولا واحد دخل مزاجي شوق:لا تضيعين السالفه وقولي لي منهو فهد اول مره اعرفه غلا:قلبي صاير فندق خمسه نجوم شوق:اخاف عشره هههههههههههههههه يالله قولي غلا:طيب طيب.. يا طويله العمر اول واحد حبيته فواز وتعرفين سالفته شوق:منهو فهد؟؟ غلا:تعرفين المراقب اللي معنى بالمنتدى..؟؟ شوق:ايه وش فيه؟؟ غلا: هذا انا اضفته عندي بالمسن شوق:يالزفته ولا تقولين..؟؟ غلا:وش اسوي ما جا وقت شوق:عاش مصرف القبايل؟؟ بس تراه اسلووووووووووب غلا:شويه عليه اسلوب خطير ما عمري شفت مثله..ما اكذب عليك اذا قلتلك هو سبب الاول اللي خلاني اجلس بهذا المنتدى باسلوبه شوق:الله كل هذا فيك المهم كملي غلا:هههههه.. وصرنا دايم نكلم بعض وصرت ادخل المسن في الاوقات اللي يدخل هو فيها وصار يشكي لي .. بس صدمني لما قالي انه يحب وحده من قرايبه وبيتزوجها شوق:اكيد انقهرتي؟؟ غلا:لا ما انقهرت.. الاني مقتنعه اني انا وياه مستحيل نجتمع الله يوفقه شوق:ما قلتي لي عنه.. غلا:الاني ما طولت معه ..خليني اكمل لك.. بعدين لما عرفت انه تزوج قلت له يسوي لي بلوك ودليت عشان زوجته شوق:وحط لك؟؟ غلا:اكيد ولو هو ماسواها انا بسوي له شوق:هذا فهد ومنهو فارس اللي اعرفه انك تكرهينه غلا:صديق وليد نفسه..حبيته قبل ما يرسل لي مسجات ويرسل هديه التخرج..كنت احب سوالف مع وليد بس طاح من عيني لما سوا هالحركات شوق:بالعكس المفروض تحبينه اكثر غلا:لا بالعكس كرهته وحسيت انه راعي لف ودوران..؟ شوق:وانتي ماشاء الله على طول تحبين وتنسين غلا:هههههههههههه.. الله ياخذك نسيته الان قدامي فيصل ولد خالتي تعرفين بعد الحفله سافرنا معهم لمكه شوق:انتي تحبين فيصل؟؟ غلا:اكذب عليك اذا قلت ما احبه مع اني مجننته في السفره مطلعه فيه نخل في راسه شوق:هههههههههههههههههههه ليش غلا:بس دايم اعناده واسوي فيها شوق:ليش طيب تعانديه دام انك تحبينه غلا:ما ادري..بس خلاص كل شي انتهى بغباء مني شوق:ليش وش صاير؟؟ غلا:فيصل بيتزوج بنت عمه شوق:وانتي؟؟ غلا:وش فيني شوق:هو ما يحبك؟؟!! غلا:يعتبرني مثل اخته لا اكثر على كلام خالتي امل بس انا الغبيه حبيته شوق:انتي مو غبيه انتي عاطفيه..بعدين انتي لما انصدمتي من حركة فارس لقيتي فيصل عون لك وانه راح يحميك من أي خطر راح يصير لك..كانت ردة فعل غلا:جايز ليش لا.. شوق:متى ملكته؟؟ غلا:تملك وخلص ..تصدقين ماعاد يدق علي اول كل يوم والحين حتى مسج ما شافت شوق:اكيد منشغل فاضي لك بس هو.. غلا:عاد انتي انشغلي عني بزوج المستقبل يا ويلك وتدخل عليهم ابرار ابرار:وينكم وانا ادوركم شوق:ليش ضايعين غلا:يمكن ابرار:لا استهبال يالله العشاء شوق:يالله جينا غلا:فقدك يالدبه ** 8 8 8 8 8 *8 في يبت ابو راكان ابو راكان:مافي سفر بدون زواج فاهمني انت..تبي تضيع انت راكان:يبه مو صغير انا عشان اضيع ..لا تحطم مستقبلي ..الحمد الله انهم وافقو ابو راكان:بس الزواج يحميك راكان:ومنهي اللي بتتزوجني وانا توني صغير ما كملت نفسي ام راكان:الف وحده تتمناك ..لا تحطها حجه ابو راكان: وليش ندور وبنت عمك موجوده خذها وبدون مهر راكان:من تقصد حنان ابو راكان:عندي غيرها انا؟؟ راكان:يمكن ما توافق ابو راكان:اناديها لك واسئلها راكان:يبه بلاش احراج انت رح لها في غرفتها ابو راكان:روحي يا منيره اسئليها * 8 * 8 8 في الرياض في بيت ابو تركي مكلة منار على عبدالعزيز ولد صديق ابوها تركي: مبروك منار الف الف مبروك منه المال ومنك العيال ام تركي: عقبالك وانا امك تركي: امين.من بؤك لباب السماء.. الا اقول وين منال ما اشوفها؟؟ منار: منال فوق.. وراح تركي فوق لغرفه منال ويطق الباب عليها تركي: منال... منال منال:ادخل ويدخل تركي ويلقى عيون منال متفخه من كثر الصياح تركي:منوووووووله قلبي تصيح ليش؟؟ منال:ما ابي منار تتزوج تركي:كنك بزر على كلامك كذا..وليش ان شاء الله ما تتزوج..تبي تعنسينها.والا تبين تتزوجين قبلها منال?ترمي عليه المخده):سخيف ما عندك سالفه تركي:عندي سالفه بس عطيني بشارتك واعطيك منال:أي بشاره؟؟ تركي:منهي العروس الجاهزه اللي قلتيلي عنها منال:جاي تبي مصلحتك تركي:عطيني مصلحتي واعطيك مصلحتي منال:اوكي يعني وحده بوحده تركي:اممممم..تقدرين تقولين منال:انا ما عندي غلا صديقتي وش رايك؟؟ تركي?يبتسم:احلى واغلى غلا على وجه الارض..انا موافق بس تتوقعين توافق علي منال:وهي تلقى مثلك..وبعدين امي تحب غلا وتعرف امها ..وصدقني ما راح تلقى احسن منها..ويالله بشارتي سيد تركي تركي:خالد ولد خالي منال?متحمسه:وش فيه؟؟ تركي:قالي اسئلك اذا موافقه عليه اذا تقدم لك..احسن من تصير رسميه..الانه يبي يعرف رايك اول منال:انت وش رايك فيه؟؟ تركي:منال بلا لف ودروان..ادري انك تحبين خالد منال:وش دراك تركي:ههههههههههههههههه..زين منك فضحتي عمرك..قلتها صدفه هههههههههههههههه منال:صدق سخيف يالله برا الغرفه انقلع تركي:وجهك صار احمر ياربي على اللي يستحون منال:اطلعععععععععععع تركي:انا بكلم خالد وبقوله انك موافقه ولا تنسين تكلمين غلاوي حبيبة قلبي سي يووووو 8 * 8 بعد اسبوعين.. والاحداث اللي صارت فيها منال ما قالت لغلا عن تركي الانها تتنتظر الوقت المناسب ابرار ووليد احسن ما يكون.عايشين قصة الحب ما عاشها احد قبلهم فاهمين بعض والله لا يغير عليهم منال وافقت على خالد حبيب القلب الاول والاخير فيصل مستانس بحياته الجديده ..ومن كثر ما هو مستانس قرر يقدم موعد الزواج فواز عايش في حاله محيره..ما يدري وش يسوي بغلا اللي مو عطيته وجه ابد راكان وحنان تملكوا وموعد سفرهم قريب...وهم مستانسين مع بعض الحيل الانهم مناسبين لبعض لبنى عايشه حياتها بالطول وبالعرض هي ومشاري وسهى بدري عليهم في الحب ساره زواجها بعد ملكة شوق بثلاث ايام وهي عايشه حاله رعب وخوف منار ما بعد حددو يوم الزواج وهي مستانسه بايام الملكه وما ودها تخلص اكيد بتقولون وين شوق شوق ملكتها اليوم على ولد عمها وشوق سوت نفس ساره وما كبرت الملكه خلتها متخصره بس على اهلها واكيد نادت غلا ومنال شوق: تصدقون اني خايفه منال:احد يخاف من اللي يحبه شوق: ما ادري خايفه غلا: اليوم ملكتك وزواج فيصل ولد خالتي منال:زواجه اليوم غلا: ايه بس ما مو كبير وتدخل عليهم لبنى بالدفتر التوقيع ((ما ادري وش اسمه هع))عشان توقع شوق: يمممممممممممممممممه بطني منال: ذكرتيني بمنار اختي ههههههههههههههههه غلا: نشوف يوم ملكتك عاد انتي وش بتسوين لبنى: يالله شوق وقعي كنك توقعين على اخر يوم لك بالاختبارات منال: زين علمتيني عشان اسويها يوم ملكتي لبنى:هههههههههههه..شفتي اني راس منال: لا شايفتك بطن خخخخخخ غلا:قولي بسم الله ووقعي.. وانتي وياها انثبروا شوق بيد ترتجف:بسم الله ووقعت كلهم:كلولووووووووووووووووووووووووووووووش الف اصلاة والسلام عليك يا حبيب الله محمد والكل يبارك لها امها وشوق وغلا ولبنى اللي دمعت عيونها على فراق اختها منال:يالله افتحي جوالك غلا:حشى مقفلته اسبوع ..مافي امل اقفله الا اذا جيت انوم وانتي اسبوع مافي حل وسط وتفتح جوالها وتجيها مسجات من خدمة موجود ومسجات نصيه ووسائط منال: ماشاء الله وش ذا المسجات كل هذا شوق من حبيب القلب شوق تناظرها وتبتسم :وش دراك منال: عندس الحاسه السادسه غلا: اقري اقري لنا وش يقول وش مشاعره بهاليوم شوق تناظر الجوال وساكته لبنى:هييييه شوق وش كاتب شوق: انتي خاينه منال: وش قامت تخربط ذي وش تقول وتاخذ منال منها الجوال منال: غلا مرسل انتي خاينه غلا: يمكن مقلب شوق: انا وش سويت عشان يقول كذا..والله ما سويت شي(وتبدا تصيح)) غلا:بس مرسل هالكلمتين لبنى:لا يكون بياخذ اختي يعذبها؟؟ غلا: كملي المسج انتي بعد منال:انتي خاينه تتمصلحين معي عشان اخوي..تبين تاخذين اخباره مني..وانا على بالي تحبيني)) شوق وهي حاسه نفسها في حلم:شنو مو فاهمه شي تدخل عليهم عبير(ام شوق) عبير: تغطوا يا بنات ابوها بيسلم عليها غلا ومنال تغطوا وكل وحده ما تدري وش السالفه بس حسوا ان الموضوع خطير ابو شوق: مبروك عليك صالح يا بنتي ومنك العيال ومنه المال شوق: انا..انا .. انا تزوجت صالح..يعني ما تزوجت عبد الله!! ابو شوق وهو يمسح دموعها:ايه صالح ولد عمك عبد اللطيف وش عبد الله..؟؟ شوق من الصدمه اللي ما توقعت بيوم يصير لها احست انها في فيلم هندي مو يصير على الحقيقه..تتزوج اخو حبيبها.. طاحت عليهم عبير:شوق ..شوق ابو شوق:جيبوا لي مويه والا عطر وابوها وامها يحاولون انها تصحى بعد ما صحت بصعوبه حطوها على سريرها وهي دموعها اربع اربع مو مصدقه اللي يصير لها ومحتاره ما تدري وش تسوي ترضى بالامر الواقع وتتزوجه والا ترفض وتكنسل الزواج من اصله افكاراها كثيره وما لقت حل لمشكتها الكبيره * * 8 في بيت غلا بعد ما رجعوا من بيت شوق منال:ياربي ضايق صدري على حاله شوق.. غلا:كسرت خاطري..تخيلي اللي تحبه تتزوج اخوه منال:ابي افهم وشلون هي ما درت والا كيف ..مو قالوا لها ولد عمها غلا:لبنى تقول انا احبه بعد عبد الله..الانهم هو قالوا ولد عمي عبد اللطيف ما توقعناه ابد يطلع صالح منال:يعني امها وابوها ما يدرون غلا:وش ذا الغباء الا اكيد يدرون انه صالح..بس شوق قالوا ولد عمك على بالها عبد الله..يا عمري واتذكرها ااول تقول مسويها لي مفاجئه..يالله الله يعينها منال:حرام ما تستاهل..مع ان حبهم يضرب فيه المثل مو احنا الله يخلف علينا غلا:ههههههههههههه لا يكون احنا اللي صاكينها عين.. منال:هههههههههههههههه..خير ان شاء الله..ما توصل هالدرجه غلا:الا تعالي الناس وين ناويه تسجلين يالعمه منال:احم احم؟..كبرتيني لدرجه صرت عمه..شكرا..بس وين ما انتي تبين انا معك واسطتي بيدي غلا:انا شكلي تربيه خاصه بسجل منال:اشوفها صايره موضه عسى ماشر غلا:لا ياقلبي مو موضه..انا افكر من ناحيه المستقبل منال:ياربي يا مستقبل انتي اهجدي بس.. غلا:ياشين التحطيم منال:هذا الصدق..الا حنان وش تتوقعين سجلت غلا:صدق اننا صديقات مو شي من زمان عنها وش رايك ندق منال:وتشاورين بعد ..دقي غلا:شفتي وشلون احبك كل شي اقوله لك وتدق غلا على حنان ويحطون على المايك(الميكرفون)) منال وغلا بصوت واحد:مرحبا حنووووو اشتقنا لك كثير يالبطه حنان: ياهلا ومرحبا باللي ناسيني منال:ازيك غلا:عامله ايه ياست حنان: الحمد الله عم نشكر الله,,انتو كيفكم منال: انا بخير غلا:انا عال العال حنان:دوووووم يارب منال: اشتقنا لك وفقدناك حنان:تشتاق لك العافيه غلا:حسبي الله على من فرقنا منال تبي تغير الموضوع الانها حست ان غلا من اليوم ودها تصيح بس ما لقت شي يشجعها عشان كذا غيرت السالفه:حنان وش سجلتي؟؟ حنان:ما سجلت غلا:اجل وش تسوين في بيت عمك؟؟ حنان: انتم فاضيين اقولكم سالفتي... منال: لو كنا مو فاضين كان ما دقينا عليك حنان:منول للحين خبله ما عقلتي غلا:هذا وهي ببتزوج حنان:لا لا..عاد هاذي بزعل صدق ليش ما علمتوني منال:توني يالبطه ما تملكت ..بعدين ازعلي على شوق اليوم ملكتها حنان: مبروك لها يارب وصولو لها سلامي ..وانتي مبروك مقدما منال: الله يبارك فيك..ممكن السالفه اخت حنان تحمسنا حنان:طيب لا تاكليني وقالت لهم كل شي يوم عمها كسر جوالها ومعاملته القاسيه لها ..وكل شي يهون يوم حرمها من الطب ..وانها الحين تستعد للزواج من ولد عمها راكان وقالت لهم كل شي بشكل مختصر منال: حنان والله وكبرتي حنان:تصدقين صرت عجوز ..اللي يسمعك يقول تعديت الثلاثين وانا توني 18 ..بس تزوجت مبكره غلا: عمك غاصبك على ولد عمك حنان:لا والله..بالعكس فرحت لما قالي..الان راكان غير عمي طيب وحنون وكل شي فيه حلو منال:الحب عامل عمايله غلا:واسمه راكان مشخص اسمه بعد موب عاقل حنان: اكيد مو زوجي غلا:هههههههههههههههه..والله صرتي تقولين زوجي كبرتي من جد منال: حتى انا زوجي اسمه خالد غلا:هههههههه غرتي..وانا وش يجلسني مع متزوجات حنان: وانتي ورا ما تتزوجين غلا: اللي يسمعك يقولون صافين طوابير عند باب بيتنا وانا اقول لا..جيبي لي معرس منال:هههههههههههههه..عندي المعرس جاهز بعد غلا: المهم حنان بتسوين زواج كبير حنان:لا تملكت قبل اسبوع وطيارتي بكره منال:شهر عسل حنان:لا ياقلبي بروح ادرس في بريطانيا غلا:حركااااااات والله .. منال: رازن بتروح معك؟؟ حنان:اكيد غلا: الله يوفقك ياقلبي والله راح نفقدك منال: حنان لا تنسين تقولين لي التفاصيل عشان اتعلم منك حنان:ههههههههه ابشري...بس انتي لا تنسين المعرس لغلا عيب تقعد عزوبيه غلا:كنكم طبيتوا فيني يالله بس مع السلامه حنان:مع السلامه سكروا من حنان وهو يدعون لها بالتوفيق وان شاء الله الله يعوضها براكان ولد عمها منال:ما اتخيل حنان عروس غلا:كلكم تزوجتو الا انا منال:انا توني لا تقولين تزوجتوا غلا:ملكتك قريبه منال:تتذكرين اول ..وش نقول..مافي زواج الا بعد الجامعه غلا:ههههههههههه.والمشكله ما بعد دخلتوا الجامعه وتزوجتوا منال:تخيلي ابوي بيزوجني انا ومنار وتركي بيوم واحد غلا:تركي بيتزوج بعد.. منال:جاري البحث على عروس مناسبه له وحلوه مثلك,,وش رايك نخطبه لك؟ غلا(تمزح):امممممم..فكره مش بطاله منال:احسن بعد عشان يكون زاوجي وزواجك بيوم واحد وتطلع جوالها تدق على تركي منال:اجل بدق على تركي ابشره انك موافقه غلا:هييييييه انتي يالخبله من قال اني موافقه منال:مو تو تقولين فكره مش بطاله غلا:ماخذه الموضوع مزح يالدبه مو جد مثلك منال:لا حبيبتي زمان الضحك راح..الحين بدينا بالجد...وعلى فكره تركي هو اللي قال ابي غلا يعني مو عندي غلا:جاده؟؟؟؟؟؟ منال:والله العظيم بس شوفي هو بيسافر برا يكمل دراسته ..والله تركي حبوب لو انا مو اخته كان تزوجته غلا:احلفي قوه بس انتي وخشتك.اقول بتجين زواج ساره منال:لا تضيعين السالفه.. غلا:انقلعي بس عني بتجين او لا منال:ايه بنجي عشان نخبك هناك غلا:هناك تخطبوني ليش ما عندنا بيت منال:ههههههههههههههههههه يعني موافقه ياربي فديتك غلا:افكر منال:قولي موافقه وخلي زواجنا بيوم واحد * * * 8 شوق رضت بالامر الواقع بس حبها لعبد الله باقي..في قلبها بسبب غبائها مو قادره يلتئم ,,بس مافي اليد حيله..وهي لازم تتئقلم على الوضع الجديد,,اللي هي اختارته بنفسها * * * بعد ثلاثه شهور ساره تزوجت وكان زواجها احلى ما يكون الكل فرحان لها الان اول وحده تتزوج في العايله شوق حطت زاواجها مختصر ما حبت تكبره..مالها داعي الناس يفرحون لها وهي اصلا مو فرحانه.. وهي في قلبها حزن ما يعلمه أي احد حنان سافرت لبريطانيا مع راكان وحياتها حلوه..والحمد الله راكان عوضها عن كل شي فقدته وحنان كملت دراسة الطب اللي هي حلمها الاول والاخير * غلا ومنال ومنار..رايحين جايين للسوق.. وتحضيرات الزواج وكل وحده فرحانه بزوجها وراضيه عنه وفرحتهم ما تنوصف * * * في يوم زواج منار لعبدالعزيز..وغلا لتركي..ومنال لخالد كلهم في يوم واحد..وعرايس كل وحده احلى من الثانيه.. كلن زواجهم مره خطير الكل يمدحه من كل النواحي الديكور_الطقاقات_التقديم_الاستقبال_مافي شي ينعاب في زواجهم _كامل والكامل الله على ساعه وحده تنزف منار لحالها كانت زفتها مره حلوه وهاديه والموسيقى والشعر مخليتها احلى واحلى.. طلعت منار من الكوشه الساعه2 وعلى الثنتين ونص زفة غلا ومنال مع بعض.. وكان فساتينهم مثل بعض الان هاذي امنيتهم من يوم كانوا صغار.. زفتهم مره رومنسيه..والشاعر ابدع في قصيدته لغلا ومنال على المنصه الكل يبارك لهم.. الف الف مبرررررررررررروك تستاهلون يااحلى عرايس كانت هاذي حنان جايه من بريطانيا خصيصا عشان زواج غلا ومنال منال:هلا وغلا تو ما نورت القاعه غلا:احلى مفاجئه بحياتي حنان:زواج الثنائي المرح ولا اجي مستحيل شوق: وانا ليش ما جيتي حنان:هلا وغلا شوق مبروك مع انها متاخره بس تعرفين الظروف اقوا مننا شوق:لا عادي ياقلبي امزح معك..وش اخبارك وش علومك حنان والله الحمد الله بخير انتي اخبارك غلا: انتي وياها خلو السواليف بعدين منال:ودي ارقص حنان: يالله قومي نحط شوط خاص غلا:مو صاحيه تسويها منال:كل يوم متزوجه انا ابي شوط خاااااااااص فيني وفي غلا غلا:انا لا شوق:مو على كيفك وتروح شوق تطلب شوط خاص لغلا ومنال الطقاقه:شوووووووووط خاص للعرايس وقاموا البنات يصفقوووووون ويصفرووووووون وقامت غلا ومنال وجت ام غلا وام منال يرقصون معهم خلصت مراسيم الزواج والكل كان فرحان ويدعي لهم بالتوفيق * * * 8 8 * * 8 بعد ثلاث سنوات مرت عليهم كلهم بالمر والحالي بلحظات الحلوه والمره.. بذكريات عاشوها مع بعض مو قادرين ينسونها غلا رجعت الارض الوطن بعد غربه عشان دارسة تركي غلا معها بنت اسمها ((غاليه)) ومنال معها ولد اسمه((فيصل)) شوق مرتاحه بحياتها مع صالح وتحمد ربها انها صارت من نصيبه..وشوق معها ولدين فهد وعبدالله حنان:لازلت تدرس طب ومعها بنت اسمها لينا وفيصل ولد خالة غلا ما رزقه الله بشي وهم الحين يعالجون ساره معها بنتين جود ونجود منار: عندها ولد اسمه ياسر وابرار ووليد زواجهم قريب فواز حالته كل مالها للاسوء لبنى في ثالث ثانوي ودها تجيب نسبه بس تقول دام في واسطه من منال مو لازم سهى عايشه حياتها ومطنشه الدراسه وحكمتها في الحياة(الدنيا فانيه)) مشاري عقل شوي بس عن ايام المراهقه بس ما زال مصرقع * * * في يوم زواج وليد وابرار غلا: الف الف مبررررررررررروك يا وليد واخيرا فرحت فيك.,مبروك يا ابرار تستاهلين كل خير وليد:الله يبارك فيك غلا:لايقين على بعض بسم الله كناري وليد:غلوووووي..حبيبة خالو تعالي سلمي دخلت ساره عليهم بعد ما سلمت ساره:غلا ممكن شوي راحت غلا معها ساره:هاذي رساله عطانيها فواز في يوم زواجك قال اوصلها لك بس اللاسف ما قدرت ..واتمنى الحين وصلتك الامانه..والله ترى ما فتحتها ولا ادري وش فيها غلا وهي تاخذ الورقه:فواز وش اخباره ساره:سافرا برا وتزوج من هناك غلا:الله يوفقه ساره:الحين انا بروح اشوف الوضع برا غلا:وانا جايه معك غلا ما فتحت الرساله قالت بتقراها على رواق منال:اقول وين مرت ولدي غلا:عند خالها منال:ما راح تنزف ابرار غلا:لا وليد رافض هالفكره تخاف تنظل منال:هههههههههه من الحين بدينا شوق:شفتي الحب عامل عمايله غلا:الله يوفقهم يارب الكل :امييييييييين دق جوال غلا وكان تركي يبيها تطلع منال: منهو شوق: وش عليك انتي لا تصيرين ملقوفه وهي تقوم:علميها يا بنت عمتي الاصول غلا طاحت الورقه منها وهي رايحه لتركي خذتها منال وفتحتها الا نها على بالها ورقه عاديه ما توقعت فيها شي ((السلام عليكم ورحمة الله وبركاته.. يوم حياة جديده عالم جديد تعيشينه مع من اخترتي العيش معه.. تمنيتك لي في يوم من الايام غلا اسمك يمشي في عروق دمي..غلا تتذكري الخاتم اللي اهديتك اياه يوم تخرجك..؟؟ غلا انا حبيتك من كل قلبي..بس انتي ما فهمتيني.. انااحبك والله العظيم احبك مو قادر اتخيل انك لواحد غيري وعارف ومتاكد ماعاد ينفع الصوت لافات الفوت محبك الى الابد فواز)) منال اول ما قرتها شققتها ورمتها في اقرب زباله((وانتم بكرامه)) بعد العشاء تذكرت غلا الورقه قامت تدورها ما لقتها منال:غلا وش فيك غلا:ما شفتي ورقه طايحه منال:لا ليش؟؟ غلا:بس ادورها منال:لهدرجه مهمه.. غلا:اصلا ما قريتها عشان اعرف هي مهمه او لا؟؟ منال:اجل لا تدورينها وانسي الماضي\ تركي يحبك ياغلا غلا: وانا امووووووووووووووووووووووووت فيه * * 8 وكذا خلصت روايتي قبل كل شي احمد الله انه اعطاني القدره على تكملة روايتي اتمنى انها عجبتكم.. وقبل كل شي احب اقولكم كلها من وحي الخيال ..مافي شي من الواقع..ولو كان فيه تشابه بالشخصيات ..مافيه تشابه ابد بالاحداث ومن اعماق قلبي احب اشكر صديقاتي((حنان؟&ومنال)) الان لهم الفضل بعد الله سبحانه على ان اكمل روايتي تحياتي لكم كاتبه الراوايه ((الــــــــــــــــــــــــدره النــــــــــــــادره)) كلمتي الاخيره هاذي روايتي كامله وحقوق الطبع محفوظه وارجع قول ما احلل احد ياخذ روايتي من دون ما ينسبها الاسمي ((للدره النادره)) <<ما تنلام واتمنى انها نالت على اعجابكم واشكر كل من رد علي واقول مروركم يسعدني ويشجعني باب النقد مفتوح للكل لا تنسوني من ردودكم <<كم مره قالتها هع دمت بود من تحبون در در |
|
|
|
|
02-19-2008, 04:05 PM
|
#38 | |
|
:+:هيبة متطور:+:
|
|
|
|
|
|
08-03-2008, 08:35 AM
|
#40 | |
|
:+:هيبة مميز:+:
|
[align=center]يعطيك الف عآآآآآآآآآفيه على الطرح
كوني بخير[/align] |
|
|
,’
لَستُ سيئه ... جِدًا ... ولن اكون ذلك المَلاك !! فـ مَن سيقذفنِي بالسُّوء فليتمهَّل !!! وَمن سيُنزِّهني عَن كُل شَيء ... فـ ليحترِص ..، ! لديّ ذُنوب اتمنى ان تكون صغيره يَجهلهَا الْجَميع ...، ويعلمهَا الخَالق وحدَه !!! ,’[/FONT][/SIZE][/RIGHT][/FONT][/COLOR]
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
^-^ جميع آلمشآركآت آلمكتوبهـ تعبّر عن وجهة نظر صآحبهآ ,, ولا تعبّر بأي شكلـ من آلأشكآل عن وجهة نظر إدآرة آلمنتدى ~
|
شبكة هيبة ملك -
الأرشيف -
|
العرض العادي
