بسم الله الرحمن الرحيم
6 رجال لا تتزوجيهم!!!
--------------------------------------------------------------------------------
[1-(((ولد امه)))
هذا اللي تربيته على يد امه بس .. شكلته على مزجها منذ نعومة حوافره .. رقيق
ناعم (ما يهش و لا ينش)..امه اللي تشتري له و تختار له ملابسه و اكيد فتاة احلامه
بعد امه اللي تختارها له.. لو تتزوجينه كأنك متزوجة امه ..هي اللي بتختار غرفتكم و
بتتحكم في زواجكم ولو ودك تروحين لأهلك شاوري امه..
اذاخطبك قولي لامه انا ودي بواحد يسكني في الصمان و لا روضة خريم انا ويااه
لحالنا..
2- راعي (((راعي البنات((الغزلجي)))
هذا الشخص مخه ما فيه غير شخابيط جنبها صور بنات.. اربع و عشرين ساعة يتسدح
و يتبطح عند الفيديو كليب..و يعرف مقاسات الجنوز حق الرقاصات و المطربات..كان
في مراهقته يمتر التخصصي ذهابا و ايابا ..و في شبابه رقم جواله اكثر شهرة عند
البنات من (902) ..ناهيك عن بطاقات السوا و ما ادراك ما بطاقات السوا..هذا من حبه
للبنات يقول للخطابة يا عمري و للشغالة يا حياتي ..و انتم في الكوشة احتمال يرقم
الطقاقة .
اذا خطبك اوصيك تطلبين تشوفينه من ورا جدار و اذا شفتيه حتى لو انه اطخم قولي
بصوت عالي (وععععععععععع وش ذا عسى مهوب العريس).
3-(((المتعصب لناديه المفضل)))
هذا مستعد يتضارب مع خلق الله عشان الكوره..مع كثرة المباريات و مرور الايام بيهبل
فيك ..يوم منهبل من فرحة الفوز و يوم منهبل من قهر الهزيمة.. و طبعا في الفوز
بيحتفل مع الشله و في الخسارة بيحط حرته فيك..اذا خطبك و كان هلالي قولي له
انا نصراوية و اعشق البلوى و اموت في فن محمد نور ..و اذا كان نصراوي قولي له انا
ابي زوجي يكون اسمه سامي و ابيه طويل مثل الدعيع و ابيه يشبه ياسر القحطاني
و ما راح اتزوجك الا اذا جاب النصر بطولة.
4-(((مدمن القراءة و الكتابة و الاطلاع )))
هذا اللي وسادته قاموس المحيط و يتلحف بغلاف مجلة ادبية..
ما شاء الله عليه كلامه على طول مرتب و ينتقي الفاظه بعناية ..هذا من كئابة الحياه
معه كل ظهر بتاخذين شنطتك و تطلعين من بابكم تحسبين انه وقت الطلعة من
الجامعة او المدرسة من كثر المحاضرات اللي تسمعينها منه ..اغسلي يدك من
الضحك و المزح و الرمانسية معه .. نص كلامكم عن الحداثة و الشعر العامودي و النص
الباقي عن القصة القصيرة على مدري و شهو.. اذا خطبك قولي للخطابة ان اول و
اخر كتاب طبخ قريته لقيته هدية مع زيت العربي.
5-(((البخيل)))
غالبا يكون ثري و اذا عطوك المعلومات عنه خفيتي معه .. وظيفة و رصيد في البنك ..
و اذا انكشفت الامور طلع الرجال جلدة مقطن..الريال ما يطلع منه الا بخطة
استراتجية ..و الفلوس ما راح تشوفينها الا اذا راح يودعها في البنك .. هذا زواجكم
بيكون في مقلط اهلك و السياره اللي بياخذك فيها لعش الزوجية كابريس 80مصدوم
مع الرفرف ..و بعد ما تطلعون من بيت اهلك ليه زواجك بيلف بك شوارع الرياض لين
يلقى مطعم بخاري ما قفل ابوابه و يشتري لك عشاء الزواج نص حبة بخاري في باغة
و يكثر السلطة علشانها بلاش.
هذا اذا خطبك قولي للخطابة ان ابوك ايام المدرسة كان يعطيك فسحتك سندوتشات
كافيار و شيكات كل شيك الف ريال و انك ما عمرك شفتي الكبسة الا في طاش ما
طاش.
6-(((المتدعثر)))
هذا الشخص بريء من الترتيب ..لا لبس و اتيكيت و لا لباقة و لا ذوق ..تجبيين له
بجامة نوم يلبسها على سروال سنة .. تعملين له مفاجأة بهدية او بحفلة يزعل و
يقول ليش ما علمتيني انا اخر من يدري؟؟..الى الحين يلبس فنيلة علاق و السروال
طويل من قدام فوق الفنيلة و من ورا تحت الفنيلة ..اذا وديتيه مطعم فاخر راح
للرسبشين علشان يجيب لك عود اسنان و طيب ليمون .. ما يعترف بالتواريخ الهامة
في حياتكم لا تاريخ زواجكم و لا عيال ..ما يعرف شي اسمه هدية الا الهدية اللي
تجي مع رز ابو كاس ..في ايام الاجازة ينام الساعة 10و الصبح يروح يشتري فول قلابة
و يقومك تفطرين معه.
اذا خطبك قولي للخطابة انك بتكملين دراستك في اذربيجان ..صح هو بيحسبها
بيدجان بس مو مشكلة اهم شيء تصرفينه.
اخوكم / " رمز الخوافي "