لاضاق صدرك وابتدا الوقت يبلاك
قلي وش اللي في زمانـك تحليـه
لاصار اعز الناس قاسي ويجفـاك
لاصار مايسعد شبابـك ويحميـه
ولاصار مايحسب حسابك ويرعاك
وكنك لدربه شمع لاشاف يطفيـه
اليوم ابشكي واعلن اسباب فرقاك
وابي السبب لاصار فرقاي تبغيـه
كم مرةً تطعـن وتجـرح بيمنـاك
وكم مـرةً بالصـد قلبـي تبكيـه
وعدتني بالحب ثم قلـت مانسـاك
وكلمة نسيتك قلبي اليـوم ترويـه
اصرخ بعال الصوت قلبي تمنـاك
ياقو قلبـك كيـف حبـي تخليـه
ماترحم اللي جاك عاني ويهـواك
وماترحم المجروح غدرك مشقيـه
وش حيلة المحروم همه ملاقـاك
وش حيلته لاصار حزنه مخفيـه
كنت بحياتي شخص محداً بيسواك
وكنت الوحيد اللي احبه ومغليـه
ارحم حبيباً صان حبـك ويهـواك
غدرك وسمك يالقضي قمت تسقيه
ياشين قلي ليه وابشـر برجـواك
وابشـر بقلبـاً بالامانـه مصفيـه
وقتاً يجيلك! تشتكي جور ماجـاك
وترجي كفوفي يوم والهم تشكيـه
لكن (وداعه) لاقست حيل دنيـاك
تذكر ( سعد) بالخير يومك تخليـه
للشاعر : سعد الشمري