وعليكم السلام ورحمة الله وبركاتة

بسم الله الرحمن الرحيم

أولاً احب اهنيك على الموضوع الراقي جداً وعلى فكرة انا كنت افكر اكتب مقال عن الإسطوانة اللي نسمعها كل سنة على مسلسل طاش . يعني ماشاءالله 18 سنة وطاش كل ماله في إزدياد سمعتاً وحباً ليش هـ الإحتكاك فيهم كل سنة مـآني عارف !!


عموماً ..

بغض النظر هم مشايخ أهل الدين أو من الطبقة الإعلامية كلهم لهم كل الإحترام والتقدير لكن ..
إلى متى وتكرار نفس الشتائم على عبدالله السدحان وناصر القصبي !

ووصل بهم الحال إنهم يصطادون في الماء العكر وعلى أي مشهد بسيط حتى وإن كان واقعي فـ
تعلى اصواتهم وشتائمهم عليهم !
يعني أقرب مشهد السدحان مع زوجته في حلقة ( التعايش )وكان الإختلاف في الفكر بين رجل الدين والعلماني . والمشهد عبارة عن رجل يمازح زوجته !!
طلعو الشيوخ الله يهديهم وقالو مايصير هذا تشويه لصورتنا و.. و.. و.. .
يعني أبي افهم هـ الشيخ هذا مع إحترامي له مايتعامل مع زوجته بـ رقة ودلال ؟ ليش تعارض دام انه ماكذب ولا بالغ في المزحه .. استغرب من هـ الضغينة اللي يحملونها على افراد طاش للأمانه .


انا احترم السدحان والقصبي ومتابع لهم بـ شششغف وإستحاله تفوتني حلقة من حلقات طاش .
لأنها تحكي واقعنا السعودي , طرح مشاكلنا مع الهيئة والمرور والبنوك والجيران و .. و.. إلآخره من المشاكل اللي نصادفها بشكل روتيني في مجتمعنا السعودي والتي تعد من الشذوذ والغرابه ولازم لها حل منطقي .

لما تصادفنا مشكلة ونبي نحل المشكلة لازم نمثل كل دور فيها , وعندنا مشاكل مع رجال الهيئة ومشاكل مع القضاء في المحاكم
فـ ملزومين إننا نمثل دور رجل دين في التمثيلية علشان نقرب الصورة أكثر للمشاهد .
ليش تمنعنى إننا نمثل دورك كـ رجل دين ؟ إذا إنت على حق فـ المفترض إنك تكون داعم لنا إننا نمثل دورك
أما إذا انت على خطأ وخايف في نفس الوقت الكشف عن اخطاءك فـ هذا مو مشكلة افراد طاش .
هذي مشكلتك إنت حاول تعدل وضعك .

فـ اعتقد لأنهم مبدعين في مجالهم الفني ولأنهم كشفوا حقائق مدسوسه تحت طاولات رجال الهيئة ومسؤوليننا العوام فـ اعلنو الحرب بشكل سنوي خوف من أن يكشف سر خطير تم تنفيذة هذي السنة .

طبعاً هذي نقطة .

النقطة الثانية واعتقد إنه مو سبب وجيه لـ الحرب عليهم لكن ربما إن العقول ارتخت
إن عبدالله السدحان وناصر القصبي علمانيين وافكارهم خارجة عن عاداتنا وتقاليدنا الإسلامية !
انا للأمانه ماأعرف أي شي عن الكلام هذا وإن كانو علمانيين فهذا ماله علاقة في طرح مشاكلنا في مجتمعنا السعودي ابداً . ماله علاقة

الطرح يختلف عن الفكر يـ هوووو <-- عصصب

انا لما اطرح مشكلة واقعية مو معناة إنك تقيمني على فكري الخاص فيني .
انا ماطرحت لك فكري ! انا طرحت لك مشكلة يعاني منها المجتمع السعودي
فـ إذا عندك نقد حاول تنتقد الفكرة وليس ممثل الفكرة .


فـ مآدري وش اقول بصراحة طاش يطرح مشاكلنا ياناس ليش تزعلون عليهم وتحاربونهم في الصحف والبرامج التلفزيونيه قدام العالم .
يعني تشّهرون فيهم قدام الخليقة .. هذا مو اسلوب راقي
واللي ينصحهم في برنامجه التلفزيوني هذا ماصارت نصيحة اكثر من إنها فضيحة .

وبعدين أول خطوة لـ حل أي مشكلة هي ( الإعتراف بها ) مافي كلام .
فـ لما طاش يعترف بـ مشكلة في مجتمعنا من رجل الدين قالو انتم كفار , على كيفك انت وياو تكفر !!

وبعدين مين هم رجال الهيئة معليش مع احترامي لهم
ناس توهم خريجين كلية العلوم الإسلامية وعاطل عشرطعشر سنة وماصدق جته وظيفة بالهئية وصار فرعون على الشباب . في أحد يعلمهم أو يردهم أو يحسن اسلوبهم مع الشباب ؟
مـآفي أبداً مخلينهم على راحتهم إلين وصل الحال بنا إننا صرنا نكره شوفتهم في الأسواق .
معليش هذي الحقيقة انا فيصل اشوف جني ولا اشوف رجل هيئة في السوق من بعد المشكلة اللي صارت لي معاهم في السوق . ظلم تعدي يعني فعلاً حقير والله حتى السلام مايسلمون ! طيب سلم أول .
ذاك اليوم انا جالس في المسجد انتظر الإقامة . الكلام هذا قبل اسبوعين في المنطقة الغربية
فـ مع طول فترة المشي ركبتي تعبت صليت تحية المسجد وجلست ومديت رجلي . اعتقد هذا طبيعي ومن حقي
صلى جنبي مطوع تحية المسجد ولما خلص والله ماسلم علي
قالي : هذي جلسة ؟ ويأشر بيدة على ركبي
سفهته شوي لأنها قفلت معي من لقافتة وقلت له : نعم ؟
قال : هذي جلسة ؟
قلت : وش تبي انت
قال : عدل جلستك
قلت : يآأبني تعبان وانا جالس في بيت الله لآمني جلست في بيتك تعال تكلم .
اللتفت وسكت .

طيب تتوقعون هذا اسلوب راقي منه ؟
إنا احتمال لأنها قافه معي منهم فـ اشوف ادنى زلة لهم جريمة بالنسبة لي وإحتمال احول الموضوع هذا خاص عن رجال الهيئة والفكر الغير سليم . يعني فكر تنفير
لكن خلوني ارجع لـ محور موضوعنا
فـ طاش ماطاش جداً راقي وانا معجب بـ طروحاته
والعدوانية اللي تتكرر كل سنة اصبحت روتينية واعتقد إنها بدون مبررات منطقية .
بس يمكن علشان الشيخ الفلاني دعاء عليهم فـ لازم نقلد الشيخ هذاك وندعي علشان نصير اكوس ناس . شي غريب والله .



عموماً افكاري غير مرتبة لأن تفاجئت بالموضوع الآن واعتذر عن الأخطاء في الترتيب أو في الإملاء .
ونرحب بـ الفكر والرأي الآخر حول طاش .

لكن اتمنى من كل قلبي بما إن الموضوع محصور على طاش وواقع المجتمع السعودي فقط إن اللي يردون يكونون عندهم فكرة بـ واقع مجتمعنا , علشان لايكون الرد فيه ظلم فئة عن فئة .


ورمضانكم مع طاش أحلى وكل يوم وإنتم إلى الله أقرب .



والسلام عليكم .. فيصل