منتديات هيبة ملك منبع إبداع لاينضب - عرض مشاركة واحدة

02-17-2010, 12:28 PM

السلام عليكم

بعض الناس انهبلت.. والا هي منهبله خلقه

طلعت من هايبرماركت قبل شوي

وانا بركب موتري الا اشوف هاك الاعلان على قزاز الهايبر ماركت

بيت للبيع وقريه كامله للبيع

لظروف السفر والابتعاث

وبسعر مغري بـ ترافيان

وحاط رقم جواله...!!!

المهم وانا ادق عليه قلت.. يمكن بيبيع ومحتاج ونستفيد كم قرش بعد ترميم البيت؛

وجلست افكر.. وين هالحي فيه اللي اسمه ترافيان!؟

مايهم يمكن من الاحياء الجديده وطقتها؛

وانا اللي ادق....

حاط صدى اغنية طلال مداح كنغمة رنين

(مقادير ياقلب العناء)

قلت.. شكله عنده ظروف قاهره والرجال غرقان لشوشته ويبي يبيع باسرع وقت؛

وارجع ريوس واشق الاعلان قلت.. لاحد يشوفه ويخرب علينا البيع ويسبقنا.. المهم رد:

مرحبا

قلت.. السلام عليكم

وعليكم السلام

كيف حالك اخوي؟ ان شاء الله تمام؟

قال.. الحمد لله

قلت.. شفت اعلانك لبيع البيت.. البيت جديد والا قديم؟

قال.. جديد من بدايات 2009

قلت.. كم سيم؟ وحدك يالغالي؟

قال.. منيب طماع، وتراي سمح

وانا اللي اقول بقلبي.. غدي الدّرَج مفصول أرغب له وفيه مسبح وبايكه وبيت شعر ومكيفات اسبيلت والبويه فيلفت

المهم قلت.. وش المواصفات؟

وهو اللي يقول: اخوي من جد فرصه لاتفوتك...؟؟

قال.. اسم الولد الله يسلمك؟

قلت.. محمد

قال.. هذي الموصفات يابو محمد

قريتي في ترافيان

وانا اللي اهوجس واقول.. شكله مطنوخ راعي قرى وشاليهات ومنتزهات

قلت.. الله يزيدك من نعيمه

شوي ويقول.. عدد السكان 4077

لها 6 قرى فرعية

قلت.. ماشاء الله تبارك الله

اشتراك قوي 20 على السيرفر

ترتيب القرية 1250

فيها320 ذهب

قلت.. شكل البير الارتوازي يسمونه ذهب من زود غلاه

والمطلوب 1500 ريال يالشيخ

قلت.. وشاللي بـ 1500؟؟

قلت.. بقلبي شكله مكثر اللبن! أو أن البيت فيه إنّ

وش هالسعر!؟

اكيد انه مهوب صاحي! لا بالله 1500.. أكيد مهبول! ولا يحسبني باستاجر يومي!؟

وانا اللي أسأله: بكم؟؟

قال: 1500

وانا اللي اصرخ واقول.. انت صادق والا تمزح!؟

قال: جاد يابو محمد! ولولا الظروف قسم بالله ما ابيعها!

وانا اللي اسأله.. الصك باسمك؟

البيت عليه مشاكل ارث او غيره؟

الحي معتمد من الامانه؟؟؟

الخدمات واصله؟

قال: ياخوي انت وش فيك؟ اي ارث واي مشاكل واي خدمات؟؟

وهو اللي يحطه على السبيكر

قلت.. شكلي احرجته والرجال حساس!

قلت له.. والبيت وينه فيه؟؟؟

قال.. بترافيان

قلت.. وترافيان بأي مكان؟

قال.. ايش؟

من قال ايش قلت شكلي غلطت

قلت.. يالشيخ الله يطول بعمرك حي ترافيان وين مكانه فيه؟؟

قال.. تستهبل انت؟

قلت.. لا والله منيب استهبل اول مره اسمع بالحي!

قال.. اي حي؟

قلت.. اللي انت باني فيه.. حي الترافيان

وهو يضحك واسمع ضحكات من حوله اثره حاطه على السبيكر

قال.. انت ماعندك كمبيوتر؟

قلت.. الا

قال.. عمرك دخلت ترافيان؟

قلت.. ابد

حدي منتديات الاسهم؟

قال.. ترافيان لعبه

واشتراك السيرفر 33

قلت.. وشو؟؟؟؟

وانا اللي اقطع الخط

ويجلس يدقدق.. وانا اللي مارديت عليه

وارقام غريبه تدق

وتاليها.. حسبي الله ونعم الوكيل

يرسل لي رساله

((حياك الله يابو محمد على النزاله حاطين عشاء في بيتنا الجديد بترافيان))

يضرب ترافيان وتضرب سنينها!! هبلت بشبابنا هالالعاب

منقـــول...!