يا مل قلبٍ كل همٍ يمسّه // مسّة جبال مهاوزات الأضلة
ولي عجوزٍ كل حيٍّ تعسّــه // حتى سفيه بالعرب جايزٍ له
طس السبيل من اشقر التتن طسّه //الشاوري يبري من القلب علّه
من كيس قرم دايم ما يدسّه// تلقاه مقروط ٍعلى جال دله
لو عندنا من غيب الأيام رسّه // الآدمي مصلوح نفسه يدله
لاشفت ضول الناس بالك تعسّه // /وان جنبك شر المخاليق خلّه
يالله ياللي كل صوت تحسه // عقد البلش غير انت محد يحله
تفرج لمن مثلي زمانه يرسه // عليه من بعض المعاني ممله
عليه من بعض المعاني محسّه // ساعة خرج من علة جاه علّه
البوم يفرس والفهد صار بسّه // تبدّلت دنياك يا فاطنٍ له
سبع الخلا كيف الضواين تنسّه // والصلح من راع الغنم ماحصل له
القبس يورد والظوامي تلسّه // والمزن عطشان الوطي ما يبلّه
لا صار عن حقك سلاحك تدسّه // ما ينعقد لك في حضون المذلّه
|