ياضيقة الصدر وش تبغين من صدري
سيفك علامك على صـدري تسلينـه
هو نقص مني وعندك نـازلٍ قـدري
و الا طبيعـه ومـن مثلـي تمرينـه
وقفّت بينك وبين الوقـت والغـدري
ونظرت فالوقـت يامكثـر مساكينـه
ثم زادت الضيقه اللي تشبه الجمـري
من حين كلٍ قرب ثـم حـد سكينـه
حتى خوي الرخاء يدري ومن بـدري
اني بحاجة ولكـن مـا الله امعينـه
ينكر وفاي وجـزاي ايبادلـه نكـري
اعطيه جزله وهو يعطينـي الشينـه
يوم انها صمّلت ماهو علـى خبـري
وفعل الردى للضعّيف دايـم ايهينـه
انا اشهد اني خسرت وباينٍ خسـري
ياكيف شينه تجـي مـردود للزينـه
لكن ابجري مع الدنيا وهـي تجـري
وابحتمل هالزمن فـي شـده ولينـه
حتى لوٍ ان الليالي صايـره عجـري
تبى تعدّل بـذن مـن عزنـي دينـه
اهم شي اتسلـى واسمـع القمـري
لا قام ينشد بصوتـه فـي بساتينـه
|