يـا ضميـري لا يهمـك مــن الدنـيـا هـمـوم
واهني الصخرة اللي مـا يحرقهـا سمـوم
الزمـان اللـي يهـد العـزم مـا هـدهـا
ما للزمـان اللـي تحـدى قوييـن العـزوم
ليـن شاهـا علـى ود مـا هـو ودهــا
والمجامل بعض الأحيان مـا يقضـي لـزوم
لا بـو النفـس الضعيفـة ولا بـو جدهـا
ميـر تجبرنـا العوايـد وتجبرنـا السلـوم
نكتـم الاسـرار يـا ليـن تاصـل حـدهـا
الـردى لا طـاح جعلـه يطيـح ولا يقـوم
باح سـده والنشامـى مـا باحـت سدهـا
كل ما كبرت وضاقت علـى عيـال الرخـوم
نحتـزم لأكبـر مصيبـة ونـاطـا خـدهـا
جعل قسمي عند ربي مـن خيـار القسـوم
واحــدٍ يـعـط العطـايـا ولا يرتـدهـا
يـا عيـال آدم وحـواء تراهـا مـا تـدوم
دورة الأيـــام لا بـدهــا لا بـدهــا
يا وليـد البـط وشلـون مـا تقـدر تعـوم
وأنت أبوك يعـوم جـزر البحـور ومدهـا
وأنت يا حلمٍ حلمته ما هـو مثـل الحلـوم
يا ضحية مـزح الأحـلام مـا دري جدهـا
أدري إن في الناس معطى وفي الناس محروم
هيـه يـا بيـض النوايـا ويـا مسودهـا
يا ضميري لا يهمـك مـن الدنيـا همـوم
الصعيبـة حِلْـهَـا والبسيـطـة عـدهـا
جات في شد الشوارب وفي قـرب الخشـوم
كبـر الضيفـه وعـش الضيـوف وغدهـا
والمراجـل مـا توفـى بضافيـة الـهـدوم
كـود بسيـوفٍ يشـوق النواظـر حـدهـا
والردي لو دَرَس المرجلـة فـي كـل يـوم
المراجـل عنـد أهلهـا يـذعـذع نـدهـا
يعتبر قسمـه مثـل قسـم زاهيـة الرقـوم
يـوم تكحـل عينهـا والـقـرون تكـدهـا
ما كسبت الا رضا اهـل النمايـم والعلـوم
يا رسول الحكـي هـات العلـوم و ودهـا
الصفـوف اثنيـن هـذا دفـاع وذا هجـوم
وأنت أظنك لا أنت معهـا ولا أنـت بضدهـا
شرهـة الطيـب تعـداك للغـوج العـزوم
وانـت صلفـات المشاريـه مانـت بقدهـا
مير فـي سـود الأظلـة تريـح ومخـدوم
وإن ذبحـك الجـوع كِـدْ التكاسـي كِدْهَـا
منقووول
|