السلام عليكم ورحمة الله وبركاته
كيف حالكم
اليوم جايب لكم سالفه حاصله لي ارجو ان تستفيدون منها ومفيده لاصحاب السفر
السالفه ومافيها اني كنت مسافر قبل ايام للقصيم
رايح احضر زواج لواحد عزيز على قلبي
وبعد الزواج كنت اريد ارجع بنفس اليوم للرياض
مع العلم اني كنت لوحدي مسافر <<<<<< نفسيه
وكانت الساعه حوالي الوحده مساء
زي العاده وقفت عند محطة الرياض السريع
اعتقد الاغلبيه تعرفونه
وقفت عند راعي البنزين وعبيت بنزين
ماسئلتون 91 ولا95
طيب انا اقول لك
عبيت 91 <<<<<داج
مالكم بطول السالفه
المهم عبيت ورحت السوبر ماركت
وتقضيت طبعا اخذت فصفص وببس <<<<نصاب مايشرب ببس
اخذت براد الشاي وعبيته شاي >>>>>اكيد اجل وش تبي تعبيه
على العموم تقضيت يوم خلصت من المقاضي
الا واشوف كوفي شوب قلت والله فرصه
مادامي بي نوم خلن اخذ لي اكسبرس
غديه يصحين
يوم خلصت وامر دورة المياة وانتم كراما
ولا فيه مغاسل يدين برا توه جديده
قلت خلن اغسل وجهي بدل ما انام
بالخط
والله وافرك وجهي لمين صحصحت
المهم
واحرك وتعدي اول 100 كيلو انا مصحصح
طبعا طربان مع اصاله {سواها قلبي }
وبعدين الا واحس اني بديت احس بالنعاس
طبعا خلصت الاكسبرس
واجيك واقول ما بدهاش
طبعا اول محاوله لتطيير النوم فاشله
الي هي القهوه
واجيك واصب لروحي شاهي
وافك كيس الحب { الفصفص }
وابد اقشم واشرب من الشاي
بعدين مليت من الفصفص
وجان النعاس مره ثانيه
واكمل تقشيم
بعدين قلت معقوله كل الخط تقشيم؟
ليش ما اشوف لي حل ثاني
واطول على المسجل وخذ لك صراخ اصاله
وماش النعاس مازال مووجود
لان الصوت اذا تعودت عليه الاذن خلاص يصير عندك عادي
على شان كذا تلقا بعض العلماء الله يجزاهم خير
اذا قعدت تسمع له تلقاه مره يرفع صوته ومره يخفضه
وبعض المدرسين يسوون نفس الحركه
وقلت وش الحل واقعد افكر شوي
<<<< من زين التفكير
اقول اوقف اخذ لي غفوه على الخط
ولا اخاطر واكمل
لان ما بقالي على الرياض الا150 كيلو
والله وانا امشي كل شوي عيني تغفي {انود}
والله واشد ظهري طلعت تقل سواق بنقالي
وادوس ثمن مادري الا وانا امشي 80
المهم اني ماش النوم هبل بي
والله واشوف جنبي علبة موية صحه
مادري وشوله شاريه
دايم اشريه واسافر وارجع ماشربت شي
بس على العادة
والله واقول بنفسي مهب يقولون المويه
تطير النوم
بس كيف كل شوي اقعد اغسل بالخط
والتفت ورا والقا فوطه صغيره >>>>>>فلم مصري كل شي عندك
اجل والقا فاين في مخبات الباب<<<<<مايمديك تحجرن اكثر المحطات يوزعون مناديل
قلت وراه ما ارطب الفاين وامسح وجهي كل شوي
كذا ماراح املي ثيابي ولا السيارة ماء
والله وتنجح الخطه
والحمد لله وصلت الرياض بسلام
وابلش بعمري عجزت انام
زي العاده
وخلصة السالفه
على العموم ارجو انكم اسنفدتو من السالفه
انكم ماتسافرون وانتم بكم نوم ولاحالكم
بس اذا حدتكم الضروف لاتنسون المويه
والمناديل تراه مجربه وحده بوحده مع النوم
خل عنك المنبهات لان كثرته مضره
على العموم
ارجو ان ما احد راح باله بعيد من العنوان
لان اختيار العنوان ماجا من فراغ
اولا الشباب ما يسمح لهم يسوقون الا بعد 18
قبل ال18 يسوقون سياكل
والبنات فوق 18 على وجه زواج
تنصح زوجه لا ينام بهم بالخط
وتعلمه الطريقه مهزب تدحاوه من الشاهي
والقهوه لمين يمرض
وتقول ابيه ما ينام
والحمد لله هذاني قاعد اكتب الموضوع